દેશભરમાં ચર્ચિત રાજા રઘુવંશીની હત્યા કેસને લઈને મોટા સમાચાર સામે આવ્યા છે. ત્યારે હવે મધ્યપ્રદેશના ઈન્દોરના ટ્રાન્સપોર્ટ બિઝનેસમેન રાજા રઘુવંશીની હત્યાને લઈને હવે એક નવો વિવાદ ઉભો થઈ રહ્યો છે. આ સમગ્ર કેસમાં શિલોંગ પોલીસે શિલોંગ કોર્ટમાં ચલણ રજૂ કર્યું છે. પોલીસ તપાસમાં સ્પષ્ટ થયું છે કે રાજાની હત્યા તેની પત્ની સોનમ રઘુવંશીના કાવતરા પર કરવામાં આવી હતી.
પોલીસના જણાવ્યા મુજબ સોનમે સમગ્ર હત્યાની યોજના બનાવી હતી અને તેના નિર્દેશ પર જ ગુનાને અંજામ આપવામાં આવ્યો. મૃતક રાજાના ભાઈ વિપિન રઘુવંશીએ ગંભીર આરોપો લગાવ્યા છે. તેમણે કહ્યું કે ચલણ પ્રક્રિયા હજુ પૂર્ણ થઈ નથી. વિપિને જણાવ્યું કે તેમના સંબંધી ગોવિંદે પહેલાથી જ સ્વીકારી લીધું હતું કે તેમની બહેન સોનમ દ્વારા હત્યા કરવામાં આવી છે અને તેને ફાંસી આપવી જોઈએ. પરંતુ હવે ગોવિંદે પોતાનું નિવેદન બદલી નાખ્યું છે અને સોનમને ટેકો આપવાનું શરૂ કર્યું છે.
સોનમના ભાઈ પર લાગ્યા આરોપ
વિપિનનો આરોપ છે કે સોનમના બેન્ક ખાતામાં લાખો રૂપિયા જમા છે અને ગોવિંદ તેની લાલચનો શિકાર બન્યો છે. વિપિને કહ્યું કે ચાર્જશીટમાં ઉલ્લેખિત મુદ્દાઓ વિશે તેની પાસે સંપૂર્ણ માહિતી નથી. જોકે, પોલીસે તેને કહ્યું છે કે સોનમે હત્યાનું કાવતરું ઘડ્યું હતું. તે કહે છે કે સોનમ કોઈ બીજા સાથે પ્રેમ સંબંધમાં હતી અને તેથી જ તેણે રાજાની હત્યા કરાવી હતી. વિપિને આરોપ લગાવ્યો કે ગોવિંદ હવે સોનમને મળવાની યોજના બનાવી રહ્યો છે અને અમારા પરિવાર સાથે છેતરપિંડી કરી રહ્યો છે.
સોનમના સતત સંપર્કમાં છે ગોવિંદ
વિપિન કહે છે કે તેણે ગોવિંદને તેની સાથે શિલોંગ જવા કહ્યું હતું, પરંતુ તેણે કોઈ સ્પષ્ટ જવાબ આપ્યો ન હતો. હવે વિપિન પોતે સોમવારે શિલોંગ જશે અને કોર્ટમાં રજૂ કરાયેલા ચલણની નકલો જોશે. તેણે કહ્યું કે પહેલા સોનમે તેના ભાઈને છેતરીને મારી નાખ્યો અને હવે ગોવિંદ પરિવાર સાથે દગો કરી રહ્યો છે. વિપિનનો દાવો છે કે તે ચોક્કસ છે કે ગોવિંદ સોનમના સતત સંપર્કમાં છે અને તેને ટેકો આપી રહ્યો છે.
