આમ આદમી પાર્ટી (AAP) માટે ચાલુ અઠવાડિયું ઈતિહાસનું સૌથી મુશ્કેલ અઠવાડિયું સાબિત થયું છે. માત્ર સાત દિવસમાં પાર્ટીએ તેના 10 માંથી 7 રાજ્યસભા સાંસદો ગુમાવી દીધા છે. આ ઘટનાક્રમે માત્ર પંજાબના રાજકારણમાં જ નહીં, પરંતુ દેશની સંસદમાં પણ મોટા ફેરફારો આણી દીધા છે. આ વિલીનીકરણને કારણે હવે રાજ્યસભામાં ભારતીય જનતા પાર્ટી (BJP) એ સ્પષ્ટ બહુમતી હાંસલ કરી લીધી છે.
કેવી રીતે પાર પડ્યું આ 'ઓપરેશન'?
અહેવાલો અનુસાર, અરવિંદ કેજરીવાલને આ બળવાની ગંધ 22 એપ્રિલના રોજ આવી ગઈ હતી. તેમણે તરત જ સાંસદોનો સંપર્ક કરવાનો પ્રયાસ કર્યો, પરંતુ ઘણાએ ફોન ઉપાડવાનું ટાળ્યું અથવા અસ્પષ્ટ જવાબો આપ્યા. હકીકતમાં, આ ઓપરેશનના ફિલ્ડ કમાન્ડર તરીકે રાઘવ ચઢ્ઢાનું નામ સામે આવી રહ્યું છે. લંડનમાં તેમની સર્જરી દરમિયાન જ ભાજપ સાથે વાટાઘાટો શરૂ થઈ હોવાનું મનાય છે. તેમણે ધીમે ધીમે અન્ય સાંસદોને વિશ્વાસમાં લીધા અને શુક્રવારે બપોરે આ મિશનને અંજામ આપ્યો.
દગો કે મજબૂરી?
આ વિલીનીકરણમાં સૌથી મોટો આંચકો સંદીપ પાઠકનો રહ્યો છે, જેઓ પંજાબમાં AAPની જીતના મુખ્ય રણનીતિકાર હતા. શુક્રવાર સવાર સુધી તે કેજરીવાલને વફાદારીની ખાતરી આપતા રહ્યા અને બપોરે સીધા ભાજપ મુખ્યાલય પહોંચી ગયા. આ ઉપરાંત, ક્રિકેટર હરભજન સિંહ અને ઉદ્યોગપતિ સાંસદો જેવા કે અશોક મિત્તલ, વિક્રમજીત સાહની અને રાજિન્દર ગુપ્તા પણ ભાજપમાં જોડાયા છે. નોંધનીય છે કે અશોક મિત્તલની સંસ્થાઓ પર વિલીનીકરણના થોડા દિવસો પહેલા જ EDના દરોડા પડ્યા હતા, જેને કેટલાક લોકો વ્યવસાયિક 'મજબૂરી' તરીકે પણ જોઈ રહ્યા છે.
ભાજપને શું ફાયદો થયો?
આ પગલાથી ભાજપના રાજ્યસભામાં સાંસદોની સંખ્યા 113 પર પહોંચી ગઈ છે, જેનાથી NDA એ પહેલીવાર સાદી બહુમતીનો આંકડો પાર કર્યો છે. હવે સરકારને "એક રાષ્ટ્ર, એક ચૂંટણી" જેવા મહત્વના બિલ પસાર કરવા માટે અન્ય પ્રાદેશિક પક્ષો પર નિર્ભર રહેવું પડશે નહીં. વિપક્ષ હવે રાજ્યસભામાં કોઈપણ બિલને રોકવાની તાકાત ગુમાવી બેઠો છે.
કેજરીવાલની પ્રતિક્રિયા
હવે રાજ્યસભામાં AAP પાસે માત્ર ત્રણ જ સાંસદો (સંજય સિંહ, એનડી ગુપ્તા અને બલબીર સિંહ સીચેવાલ) બાકી રહ્યા છે. અરવિંદ કેજરીવાલે આ ઘટનાને પંજાબની જનતા સાથેનો 'દગો' ગણાવ્યો છે. જોકે, ભાજપ માટે આ 2027ની પંજાબ વિધાનસભા ચૂંટણી માટેની માસ્ટરસ્ટ્રોક સાબિત થઈ શકે છે. પંજાબના રાજકારણનો ખરો ખેલ હવે શરૂ થયો છે.
આ પણ વાંચોઃ Bengal માં પીએમ મોદીનો હૂંકાર,કહ્યું કે પહેલા ચરણમાં બંગાળે કમાલ કરી દીધો,ટીએમસીનો અહંકાર તૂટ્યો
