Shubhanshu Shukla સાથે મુલાકાત કર્યા બાદ PM Modiએ કરી સિદ્ધીની પ્રશંસા અને આપી શુભેચ્છાઓ

પીએમ મોદી અને એ આંતરરાષ્ટ્રીય અવકાશ મથક એટલે ISSના Axiom-4 અવકાશ મિશનના પાયલોટ ગ્રુપ કેપ્ટન શુભાંશુ શુક્લા વચ્ચે મુલાકાત થઇ હતી. આ દરમિયાન પીએમ મોદીએ શુભાંશુ શુક્લાને મિશનની સફળતા બદલ અભિનંદન આપ્યા હતા. તો સાથે જ પીએમ મોદીએ શુભાંશુ શુક્લાની સિદ્ધિની પ્રશંસા પણ કરી હતી.

પીએમ મોદીએ કર્યુ ઉષ્માભર્યું સ્વાગત

પીએમ મોદીએ શુભાંશુ શુક્લાનું ઉષ્માભર્યું સ્વાગત કર્યું હતુ. તેમણે શુભાંશુ સાથે હાથ મિલાવ્યા હતા. અને તેમને ગળે પણ લગાવ્યા હતા. તથા તેમના ખભા પર હાથ મૂકીને તેમની સિદ્ધિ બદલ અભિનંદન આપ્યા હતા. શુભાંશુએ ટેબ્લેટ પર પીએમને અવકાશ યાત્રાના ચિત્રો પણ બતાવ્યા હતા. અમેરિકાથી ભારત પરત ફરેલા શુભાંશુનું દિલ્હી એરપોર્ટ પર કેન્દ્રીય મંત્રી ડૉ. જિતેન્દ્ર સિંહ અને દિલ્હીના મુખ્યમંત્રી રેખા ગુપ્તાએ સ્વાગત કર્યું હતુ. તેમના પિતા શંભુ દયાળ શુક્લા અને બહેન શુચી મિશ્રા પણ તેમને મળવા લખનૌથી એરપોર્ટ પહોંચ્યા હતા.

શુભાંશુ શુક્લાની અનોખી સિદ્ધી

શુભાંશુ શુક્લાએ ISSના Axiom-4 અવકાશ મિશનમાં જઇને ભારત દેશનો ડંકો વગાડ્યો છે. આ કાર્ય માટે તેમણે કરેલી મહેનત સફળ થઇ છે. આજે દેશ અને દુનિયામાં તેઓ જાણીતા બન્યા છે. મિશન પર જતા સમયે તેઓએ સ્વદેશી વસ્તુઓ સાથે રાખી હતી. તેમનું મિશન સફળ થાય અને પૃથ્વી પર તેઓ સુરક્ષિત પરત ફરે તે માટે પ્રાર્થનાઓનો દૌર પણ શરુ કરાયો હતો. તેમના માતા-પિતા અને પત્ની સાથે સમગ્ર દેશ માટે આ ગૌરવપૂર્ણ ક્ષણ હતી.