મહારાષ્ટ્ર શિક્ષક પાત્રતા પરીક્ષા (TET) પેપર લીક કેસમાં તપાસ આગળ વધતા નવા ખુલાસાઓ સામે આવી રહ્યા છે. પ્રાથમિક તપાસમાં જાણવા મળ્યું છે કે સમગ્ર રેકેટના તાર અનેક રાજ્યો સુધી ફેલાયેલા હોય શકે છે. પોલીસે અત્યાર સુધી રાજુ શાહુ, આકાશ કુમાર અને ધીરજ સિંહ સહિત ત્રણ આરોપીઓની ધરપકડ કરી છે. તેમાંનો એક આરોપી બિહારનો રહેવાસી હોવાનું સામે આવ્યું છે, જ્યારે સમગ્ર નેટવર્કનું સંચાલન પણ બિહાર સાથે જોડાયેલા લોકો દ્વારા થતું હોવાની શંકા વ્યક્ત કરવામાં આવી રહી છે.
દરેક સેટ માટે અંદાજે ₹37.50 લાખનો સોદો થયો
તપાસ મુજબ આરોપીઓ દિલ્હીથી મહારાષ્ટ્ર આવ્યા હતા અને કોડવર્ડ દ્વારા સ્થાનિક લોકોનો સંપર્ક કરી પેપર વેચવાનો સોદો કર્યો હતો. યોજના મુજબ પરીક્ષા પહેલાં લગભગ 24 કલાક અગાઉ પ્રશ્નપત્રની PDF તૈયાર કરીને પસંદ કરાયેલા ઉમેદવારો સુધી પહોંચાડવાની હતી. પોલીસના જણાવ્યા અનુસાર લીક થયેલા પ્રશ્નપત્રના ચારેય સેટ આરોપીઓ પાસે હતા અને દરેક સેટ માટે અંદાજે ₹37.50 લાખનો સોદો થયો હતો. આ રીતે સમગ્ર સોદાની કિંમત લગભગ ₹1.5 કરોડ સુધી પહોંચી હોવાનું અનુમાન છે. હાલ તપાસ એ દિશામાં ચાલી રહી છે કે પ્રશ્નપત્ર કેટલા ઉમેદવારો સુધી પહોંચ્યું અને આ માટે કેટલા લોકોએ રૂપિયા ચૂકવ્યા.
