Uttar Pradesh : બરેલીમાં ચાઈનીઝ દોરીથી ગંભીર રીતે ઘાયલ થયો મંત્રી સંજય ગંગવારનો ભત્રીજો, અજાણ્યા વ્યક્તિ વિરૂદ્ધ'અટેમ્પટ ટૂ મર્ડર'નો કેસ નોંધાયો

ઉત્તરપ્રદેશના બરેલીના બારાદરી પોલીસ સ્ટેશન વિસ્તારમાં પ્રતિબંધિત ચાઈનીઝ દોરીના કારણે ગંભીર ઘટના સામે આવી છે. રાજ્ય સરકારના મંત્રી સંજય ગંગવારનો 15 વર્ષીય ભત્રીજા આદિત્ય વીર ગંગવાર 15 જૂને સવારે દોડવા માટે ગયો હતો, ત્યારે શ્યામગંજ ફ્લાયઓવર પર રસ્તા પર પડેલા ચાઈનીઝ દોરીના કારણે તેઓ ગંભીર રીતે ઘાયલ થયો હતો. તેની ગરદન, હોઠ અને કાન પર ઊંડા કાપા પડતાં તાત્કાલિક ખાનગી હોસ્પિટલમાં દાખલ કરવામાં આવ્યો છે, જ્યાં હાલ તેની સારવાર ચાલી રહી છે.

ચાઈનીઝ દોરી માનવ જીવન માટે અત્યંત જોખમી

આ મામલે સબ-ઈન્સ્પેક્ટરની ફરિયાદ પર અજાણ્યા પતંગબાજો અને દોરી વેચનારાઓ સામે ભારતીય ન્યાય સંહિતાની કલમ 109 (હત્યાનો પ્રયાસ) હેઠળ કેસ નોંધવામાં આવ્યો છે. પોલીસના જણાવ્યા મુજબ આ ઘટનામાં પ્રથમ વખત બરેલીમાં ચાઈનીઝ માંઝાના ઉપયોગને લઈને એટેમ્પ્ટ ટુ મર્ડરનો કેસ દાખલ થયો છે. પોલીસે જણાવ્યું કે પ્રતિબંધિત ચાઈનીઝ દોરી માનવ જીવન માટે અત્યંત જોખમી છે અને તેનો ઉપયોગ કોઈને પણ જીવલેણ ઈજા પહોંચાડી શકે છે. આથી તેના વેચાણ, સંગ્રહ અને ઉપયોગ કરનારાઓ સામે કડક કાર્યવાહી શરૂ કરવામાં આવી છે.

શહેરના વિવિધ વિસ્તારોમાં સતત દરોડા પાડવામાં આવ્યા

ઘટનાની ગંભીરતા જોતા પોલીસ દ્વારા શહેરના વિવિધ વિસ્તારોમાં સતત દરોડા પાડવામાં આવી રહ્યા છે, જોકે હજુ સુધી મોટાપાયે કોઈ ધરપકડ અથવા જથ્થો મળ્યો નથી. બીજી તરફ રાજ્યમંત્રી સંજય ગંગવારે હોસ્પિટલ પહોંચી પોતાના ભત્રીજાની હાલત અંગે ચિંતા વ્યક્ત કરી હતી અને ચાઈનીઝ દોરી પર સંપૂર્ણ પ્રતિબંધ હોવા છતાં તેની સરળ ઉપલબ્ધિ અંગે તંત્ર પર સવાલ ઉઠાવ્યા હતા. હાલ પોલીસ આ સમગ્ર નેટવર્કને શોધવા અને જવાબદારો સુધી પહોંચવા માટે તપાસ તેજ કરી રહી છે.

આ પણ વાંચો : Delhi : ISIનું આતંકી નેટવર્ક, પોલીસ પર હુમલાનું ષડયંત્ર, સ્પેશિયલ સેલે કાર્યવાહી કરી વધુ 5 શંકાસ્પદોની કરી ધરપકડ