રામેશ્વરમ કાફે બ્લાસ્ટ કેસમાં NIAએ 1ની કરી અટકાયત,પૂછપરછ શરૂ

• બેંગલુરુના રામેશ્વરમ કાફે બ્લાસ્ટ કેસ
  
• શબ્બીર નામના વ્યક્તિની કરી અટકાયત
• CCTVમાં દેખાયો હતો એજ છે આ વ્યક્તિ ?

નેશનલ ઈન્વેસ્ટિગેશન એજન્સી (NIA) એ બુધવારે બેંગલુરુના રામેશ્વરમ કાફે બ્લાસ્ટ કેસમાં કર્ણાટકના બલ્લારીથી શબ્બીર નામના વ્યક્તિને કસ્ટડીમાં લીધો હતો. આ કેસમાં હજુ તેની પૂછપરછ ચાલી રહી છે. માહિતી આપતા અધિકારીઓએ કહ્યું કે હજુ સુધી એ જાણી શકાયું નથી કે આ એ જ વ્યક્તિ છે જે સીસીટીવીમાં જોવા મળ્યો હતો.

10 લાખનું ઇનામ કર્યુ છે જાહેર

કર્ણાટક પોલીસના સૂત્રોએ જણાવ્યું હતું કે રામેશ્વરમ કાફે બ્લાસ્ટનો મુખ્ય શકમંદ જે માર્ગ પરથી ભાગી ગયો હતો તેના સીસીટીવી ફૂટેજ દ્વારા કડીઓ એકત્રિત કરવામાં આવી હતી અને તેનું વિશ્લેષણ કરવામાં આવ્યું હતું. જેના આધારે NIAએ 10 લાખ રૂપિયાના ઈનામની જાહેરાત કરી હતી. જે બાદ આજે NIAને ગુપ્ત માહિતી મળી કે બેંગલુરુ કેફેમાં બ્લાસ્ટ કરનાર વ્યક્તિ જેનો ફોટો જાહેર કરવામાં આવ્યો છે, તે બેલ્લારીમાં છે. જે બાદ અધિકારીઓએ તેને ત્યાંથી પકડી લીધો હતો. શંકાસ્પદ વ્યક્તિ બેલ્લારી પહોંચવા માટે બે આંતર-રાજ્ય સરકારી બસમાં મુસાફરી કરી હતી. શંકાસ્પદ વ્યક્તિ અન્ય અજાણ્યા સ્થળે પણ ગયો હતો.

1 માર્ચે થયો હતો બ્લાસ્ટ

નોંધનીય છે કે 1 માર્ચના રોજ બેંગલુરુના વ્હાઇટફિલ્ડ વિસ્તારમાં રામેશ્વરમ કેફેમાં બોમ્બ બ્લાસ્ટ થયો હતો જેમાં ઓછામાં ઓછા 10 લોકો ઘાયલ થયા હતા. આ બ્લાસ્ટ સાથે સંબંધિત એક સીસીટીવી ફૂટેજ પણ સામે આવ્યા હતા જેમાં એક શંકાસ્પદ વ્યક્તિ કેફે તરફ જતો જોવા મળ્યો હતો. ત્યારથી NIAએ આ શંકાસ્પદ વ્યક્તિની શોધ શરૂ કરી. 3 માર્ચે આ કેસ સંભાળનાર આતંકવાદ વિરોધી એજન્સીએ મુખ્ય શકમંદની ઓળખ કરવામાં લોકો પાસેથી મદદ માંગી હતી, જેણે 1 માર્ચે બેંગલુરુના લોકપ્રિય ભોજનશાળામાં ઇમ્પ્રુવાઇઝ્ડ એક્સપ્લોઝિવ ડિવાઇસ (IED) લગાવ્યું હોવાનું માનવામાં આવે છે.