- રાજ્યસભામાં વિપક્ષી સાંસદોએ એવું કહીને વોકઆઉટ કર્યો
- વિરોધ પક્ષોએ બજેટને મુદ્દો બનાવીને સંસદમાં હંગામો મચાવ્યો હતો
- નિર્મલા સીતારમણે કહ્યું બધાજ રાજ્યના નામનો ઉલ્લેખ શક્ય નથી
સંસદના ચોમાસુ સત્રના ત્રીજા દિવસે જ્યારે ગૃહની કાર્યવાહી શરૂ થઈ ત્યારે ઈન્ડિયા બ્લોકના સાંસદોએ બજેટને મુદ્દો બનાવીને વિરોધ કર્યો હતો. વિપક્ષી દળોના નેતાઓએ મંગળવારે નાણાપ્રધાન નિર્મલા સીતારમણે રજૂ કરેલા બજેટને 'ભેદભાવપૂર્ણ' ગણાવ્યું હતું. વિરોધ પક્ષોએ બજેટને મુદ્દો બનાવીને સંસદમાં હંગામો મચાવ્યો હતો અને બજેટમાં રાજ્યો સાથે ભેદભાવ કરવામાં આવી રહ્યો હોવાનો આરોપ લગાવ્યો હતો.
બજેટમાં માત્ર ભાજપના સાથી પક્ષોના હિતની વાત કરવામાં આવી છે.
કોંગ્રેસ અધ્યક્ષ મલ્લિકાર્જુન ખડગેએ બજેટને 'ભ્રામક' ગણાવ્યું અને કહ્યું, "અમે ન્યાય માટે લડી રહ્યા છીએ. બજેટમાં માત્ર ભાજપના સાથી પક્ષોના હિતની વાત કરવામાં આવી છે. આ બજેટ માત્ર પોતાના સહયોગીઓને સંતુષ્ટ કરવા માટે છે. રાજ્યસભામાં વિપક્ષી સાંસદોએ એવું કહીને વોકઆઉટ કર્યો કે નાણામંત્રી નિર્મલા સીતારમણના ભાષણમાં બિન-ભાજપ શાસિત રાજ્યોનો ઉલ્લેખ પણ નહોતો.
'મેં મહારાષ્ટ્રનું નામ નથી લીધું પણ'
રાજ્યસભામાં બોલતા નાણામંત્રી નિર્મલા સીતારમણે કહ્યું, "મેં મહારાષ્ટ્રનો ઉલ્લેખ નથી કર્યો, પરંતુ અમે રાજ્યમાં એક બંદરને મંજૂરી આપી છે. તેની કિંમત 76,000 કરોડ રૂપિયા છે." રાજ્યસભામાં વિપક્ષના નેતા મલ્લિકાર્જુન ખડગેની ટીકા પર નાણામંત્રી નિર્મલા સીતારમણે કહ્યું કે, દરેક બજેટમાં તમને દેશના દરેક રાજ્યનું નામ લેવાનો સમય નથી મળતો.
નાણામંત્રીએ પૂછ્યું કે શું કોંગ્રેસના નાણામંત્રીઓએ તેમના બજેટ ભાષણ દરમિયાન તમામ રાજ્યોના નામનો ઉલ્લેખ કર્યો હતો.
તૃણમૂલ કોંગ્રેસના સભ્યો તરફ ઈશારો કરીને નિર્મલા સીતારમણે કહ્યું, 'શું તમારામાં હવે મને પૂછવાની હિંમત છે?' તેમણે વળતો જવાબ આપ્યો અને કહ્યું કે છેલ્લા દસ વર્ષમાં કેન્દ્ર દ્વારા લાવવામાં આવેલી ઘણી યોજનાઓનો અમલ કરવામાં આવ્યો નથી.
બજેટનો વિરોધ કરીને હંગામો મચાવ્યો હતો
સંસદની કાર્યવાહી શરૂ થતાં જ વિપક્ષી સભ્યોએ બજેટનો વિરોધ કરીને હંગામો મચાવ્યો હતો. લોકસભાના સ્પીકર ઓમ બિરલાએ પ્રશ્નોત્તરી કલાકની કાર્યવાહી ચાલુ રાખવા માટે સભ્યોને અપીલ કરી અને કહ્યું કે ગૃહ આ રીતે ચાલશે નહીં. ઓર્ડર પ્રમાણે કાર્યવાહી ચાલશે.
