સંસદ સુરક્ષા ચૂક કેસમાં સંડોવાયેલા 6 આરોપી સામે કાર્યવાહી, આ કારણ જવાબદાર

• સંસદ સુરક્ષા ચૂક કેસમાં સંડોવાયેલા 6માંથી 5 આરોપી સામે કાર્યવાહી
  
• દિલ્હીની કોર્ટે આરોપીના પોલીગ્રાફ ટેસ્ટની પોલીસને આપી મંજૂરી 
• આરોપીની કસ્ટડી 13 જાન્યુઆરી સુધી લંબાવવામાં આવી 

સંસદ સુરક્ષા ચૂક કેસમાં સંડોવાયેલા 6માંથી 5 આરોપીઓ પર પોલીગ્રાફ ટેસ્ટ કરવામાં આવશે. દિલ્હીની એક કોર્ટે શુક્રવારે પોલીસને મંજૂરી આપી છે. એકમાત્ર આરોપી નીલમ આઝાદે પોલીગ્રાફ ટેસ્ટ આપવાનો ઈન્કાર કરી દીધો છે.

કોર્ટે દિલ્હી પોલીસને પોલીગ્રાફ ટેસ્ટ કરાવવાની પરવાનગી આપી 

આ કેસની તપાસ કરી રહેલા દિલ્હી પોલીસના સ્પેશિયલ સેલે ગેરકાનૂની પ્રવૃતિ નિવારણ અધિનિયમ (UAPA) હેઠળ તમામ આરોપીઓનો પોલીગ્રાફ ટેસ્ટ કરાવવા માટે કોર્ટ પાસે પરવાનગી માંગી હતી. આ આરોપીઓમાં મનોરંજન ડી, સાગર શર્મા, અમોલ શિંદે, નીલમ આઝાદ, લલિત ઝા અને મહેશ કુમાવતનો સમાવેશ થાય છે.

આરોપીની કસ્ટડી 13 જાન્યુઆરી સુધી લંબાવવામાં આવી 

પોલીસ દ્વારા દાખલ કરાયેલી અરજી પર એડિશનલ સેશન જજ હરદીપ કૌરે તમામ આરોપીઓની કસ્ટડી 13 જાન્યુઆરી સુધી લંબાવી છે. પોલીસે જણાવ્યું કે હજુ સુધી આરોપીનો સોશિયલ મીડિયા ડેટા અને સિમ કાર્ડનો ડેટા રિકવર થયો નથી. તેથી તેમની કસ્ટડી વધારવી જોઈએ.

મનોરંજન અને સાગરના નાર્કો-એનાલિસિસ અને બ્રેઈન મેપિંગ કરવા માટે કોર્ટ પાસેથી પરવાનગી માગવાનું કારણ સમજાવતાં પોલીસે કહ્યું હતું કે સાયકો-એનાલિસિસ ટેસ્ટ કર્યા પછી નિષ્ણાત દ્વારા આ પરીક્ષણોની ભલામણ કરવામાં આવી હતી.

સંસદ સુરક્ષા ચૂક કેસનો માસ્ટર માઇન્ડ છે લલિત ઝા 

પોલીસના જણાવ્યા અનુસાર લલિત ઝા સંસદ સુરક્ષા ભંગ કેસનો માસ્ટરમાઇન્ડ છે . સંસદના સત્ર દરમિયાન, રંગીન ધુમાડાના ડબ્બાવાળા દર્શકો પ્રેક્ષક ગેલેરીમાંથી લોકસભાની ચેમ્બરમાં કૂદી પડ્યા, ત્યારબાદ તેઓએ ડબ્બાઓમાં વિસ્ફોટ કર્યો અને સમગ્ર ગૃહમાં ધુમાડો ફેલાઈ ગયો. તે જ સમયે, શિંદે અને આઝાદ સંસદની બહાર નારા લગાવી રહ્યા હતા. પોલીસે સંસદના ડેપ્યુટી ડાયરેક્ટરની ફરિયાદ પર કેસ નોંધ્યો હતો. આ કેસ ભારતીય દંડ સંહિતાની કલમ 186, 353, 452, 153, 34 અને 120B (ગુનાહિત કાવતરું) અને UAPAની કલમ 16 અને 18 હેઠળ નોંધવામાં આવ્યો છે. આ કેસમાં ચાર આરોપીઓની તાત્કાલિક ધરપકડ કરવામાં આવી હતી, જ્યારે લલિત ઝાને 14 ડિસેમ્બરે અને કુમાવતની 15 ડિસેમ્બરે અટકાયત કરવામાં આવી હતી.

પોલીગ્રાફ ટેસ્ટ શું છે?

પોલીગ્રાફ ટેસ્ટ દ્વારા એ જાણવાનો પ્રયાસ કરવામાં આવે છે કે વ્યક્તિ સાચું બોલી રહી છે કે ખોટું. તેને લાઇ ડિટેક્ટર મશીન પણ કહેવામાં આવે છે. આ કસોટી હંમેશા સચોટ હોતી નથી. કેટલીકવાર વ્યક્તિ સાચું બોલે છે, પરંતુ મશીન જુએ છે કે તે વ્યક્તિ ખોટું બોલી રહી છે. જ્યારે પોલીગ્રાફ ટેસ્ટ લેનાર વ્યક્તિ નર્વસ હોય ત્યારે આવું થાય છે.