પંજાબના ફિરોઝપુરમાં એક મોટો અકસ્માત થયો છે. બોલેરો પિકઅપ અને કેન્ટર વચ્ચે થયેલી ટક્કરમાં 10 લોકોના મોત થયાના સમાચાર છે. આ અકસ્માતમાં ઘણા લોકો ગંભીર રીતે ઘાયલ થયા છે. તેમને સારવાર માટે એમ્બ્યુલન્સની મદદથી હોસ્પિટલમાં દાખલ કરવામાં આવ્યા છે. ઘટનાની માહિતી મળતા જ પોલીસ અધિકારીઓ ઘટનાસ્થળે પહોંચી ગયા હતા. ઘટના બાદ હાઇવે પર ટ્રાફિક જામ થઈ ગયો હતો. પોલીસે અકસ્માતગ્રસ્ત વાહનોને દૂર કર્યા અને રાષ્ટ્રીય ધોરીમાર્ગ પર ફસાયેલા વાહનોને બહાર કાઢ્યા. રોડ સેફ્ટી ફોર્સની ટીમ ઘટનાસ્થળે પહોંચી ગઈ છે. આ ઘટના જિલ્લાના ફિરોઝપુર-ફાઝિલ્કા રોડ પર બની હતી. વહીવટીતંત્ર દ્વારા હજુ સુધી મૃત્યુઆંકની પુષ્ટિ કરવામાં આવી નથી.
પિકઅપવાન બેકાબૂ થતા થયો અકસ્માત- ઇન્સપેક્ટર
ઘટનાસ્થળ પર ચીસાચીસ થઇ ગઇ હતી. આસપાસના લોકો દોડી આવ્યા હતા. પોલીસ તપાસ કરવા પહોંચી હતી. ઇન્સપેક્ટર જસવિંદરસિંહ બરાડે જણાવ્યું કે સૂચના મળતા જ રોડ સેફ્ટી ફોર્સની ટીમ ઘટના સ્થળે પહોંચી ગઇહતી. તમામ ઇજાગ્રસ્તોને હોસ્પિટલ લવાયા છે. પોલીસ ઇન્સ્પેક્ટરે જણાવ્યું કે મજૂરો બોલેરો પિકઅપમાં મુસાફરી કરી રહ્યા હતા. તે ફિરોઝપુરથી ગ્રામીણ વિસ્તાર તરફ જઈ રહ્યા હતા તે દરમિયાન પિકઅપવાન બેકાબૂ થઈ ગઇ હતી. અને પાછળથી આવી રહેલા ટ્રક સાથે અથડાઇ.
વેઇટર તરીકે કામ કરતા હતા મુસાફરો
હોસ્પિટલ પહોંચતા જ પાંચથી વધુ લોકોને મૃત જાહેર કરવામાં આવ્યા. ઘટનાસ્થળે હાજર લોકોએ જણાવ્યું છે કે બોલેરો પિકઅપમાં મુસાફરી કરી રહેલા બધા લોકો લગ્નમાં વેઈટર તરીકે કામ કરતા હતા. અકસ્માત બાદ મૃતકોના પરિવારજનોમાં અફરાતફરીનો માહોલ સર્જાયો હતો. પરિવારના સભ્યોની હાલત ખરાબ છે, તેઓ હંમેશા રડતા રહે છે.
હાઇ સ્પીડના લીધે જીવ ગુમાવ્યો
ઘટના અંગે પ્રત્યક્ષદર્શીઓએ જણાવ્યું કે પિકઅપવાનમાં ઘણા લોકો હતા. તે ખૂબ જ ઝડપથી દોડી રહી હતી. અચાનક કાર કાબુ બહાર થઈ ગઈ. પાછળથી ખૂબ જ ઝડપે આવતા એક ટ્રકે તેને ટક્કર મારી, ત્યારબાદ એક મોટો અવાજ સંભળાયો અને લોકો ચીસો પાડવા લાગ્યા. જ્યારે સ્થાનિક લોકો ત્યાં પહોંચ્યા, ત્યારે ગંભીર રીતે ઘાયલ લોકોને વાહનોમાંથી બહાર કાઢવામાં આવ્યા. તેમાંના ઘણાના ઘટનાસ્થળે જ મૃત્યુ થયા. હાલ આ અંગે પોલીસ તપાસ કરી રહી છે.
