વેસ્ટર્ન ડિસ્ટર્બન્સ સક્રિય થવાને કારણે દેશના ઘણા રાજ્યોમાં હવામાનમાં ફેરફાર જોવા મળી રહ્યા છે. હવામાન વિભાગે આજે મેદાની વિસ્તારોમાં વરસાદ અને પહાડી વિસ્તારોમાં હિમવર્ષા અંગે ચેતવણી જારી કરી છે. આ ઉપરાંત, આગામી દિવસોમાં તાપમાનમાં બે થી ત્રણ ડિગ્રી સેલ્સિયસનો વધારો થવાની સંભાવના છે.
દિલ્હીમાં વરસાદનું એલર્ટ
હવામાન વિભાગના જણાવ્યા અનુસાર, આજે પણ રાષ્ટ્રીય રાજધાનીમાં વરસાદની શક્યતા છે. દિલ્હીમાં આજે દિવસભર વાદળછાયું વાતાવરણ રહેશે. કેટલાક સ્થળોએ ગાજવીજ સાથે હળવો વરસાદ પડશે. દિલ્હીમાં મહત્તમ તાપમાન 25-27 ડિગ્રી સેલ્સિયસ અને લઘુત્તમ તાપમાન 17-19 ડિગ્રી સેલ્સિયસ રહેવાની શક્યતા છે. બુધવારે દિલ્હીમાં અત્યાર સુધીનો સૌથી ગરમ દિવસ રહ્યો, મહત્તમ તાપમાન 32 ડિગ્રી સેલ્સિયસ અને લઘુત્તમ તાપમાન 15.4 ડિગ્રી સેલ્સિયસ નોંધાયું, જે સામાન્ય કરતા 2.9 ડિગ્રી વધારે હતું.
અહીં વરસાદની ચેતવણી
હવામાન વિભાગે 27 ફેબ્રુઆરીથી 3 માર્ચ સુધી ઉત્તર પ્રદેશમાં વરસાદ, ગાજવીજ અને વીજળી પડવાની ચેતવણી જાહેર કરી છે. રાજ્યમાં 28 ફેબ્રુઆરી અને 1 માર્ચે વરસાદ ચાલુ રહેવાની શક્યતા છે, ત્યારબાદ 2 અને 3 માર્ચે હવામાન સ્વચ્છ રહેવાની ધારણા છે.
બિહારમાં પણ તાપમાનમાં થોડો વધઘટ ચાલુ છે. પશ્ચિમી વિક્ષોભને કારણે, રાજ્યમાં વરસાદી સ્થિતિ યથાવત છે, પરંતુ તાપમાનમાં વધારો થઈ રહ્યો છે. હવામાન વિભાગનું કહેવું છે કે આગામી ત્રણથી ચાર દિવસમાં દિવસ અને રાત્રિના તાપમાનમાં 2 થી 4 ડિગ્રીનો વધારો થઈ શકે છે અને માર્ચની શરૂઆતમાં હળવો વરસાદ પડી શકે છે.
ગુજરાતમાં કેવુ છે વાતાવરણ ?
ગુજરાતના દરિયાકાંઠાના વિસ્તારોમાં ગરમી અને ભેજમાં વધારો થવાને કારણે યલો એલર્ટ આપવામાં આવ્યું છે. આગામી દિવસોમાં ત્યાં તાપમાન 2 થી 3 ડિગ્રી વધી શકે છે. મહારાષ્ટ્રમાં પણ ગરમીની સ્થિતિ વિકસી રહી છે, અને હવામાન વિભાગે રાજ્યના કેટલાક જિલ્લાઓમાં ગરમીના મોજાની ચેતવણી આપી છે. ઓડિશામાં પણ તાપમાન વધી રહ્યું છે અને માર્ચમાં ગરમી વધુ વધી શકે છે.
હિમવર્ષાનું ઓરેન્જ એલર્ટ
હિમાચલ પ્રદેશમાં હિમવર્ષાનો તબક્કો શરૂ થઈ ગયો છે, અને હવામાન વિભાગે 27 અને 28 ફેબ્રુઆરીએ રાજ્યમાં ભારે વરસાદ અને હિમવર્ષા માટે ઓરેન્જ એલર્ટ આપ્યુ છે. બુધવારે ભારે હિમવર્ષાને કારણે, અટલ ટનલ અને બે મુખ્ય રાષ્ટ્રીય ધોરીમાર્ગો પર વાહનવ્યવહાર બંધ રહ્યો હતો. ઉત્તરાખંડના પર્વતીય વિસ્તારોમાં હળવો વરસાદ અને ઊંચાઈવાળા વિસ્તારોમાં બરફવર્ષા થવાની સંભાવના છે. કાશ્મીર અને જમ્મુના ઊંચા વિસ્તારોમાં હિમવર્ષા ચાલુ છે અને હવામાન વિભાગે 28 ફેબ્રુઆરી સુધી કાશ્મીરમાં ભારે હિમવર્ષા અથવા વરસાદની આગાહી કરી છે.
