આભમાં ઉડતા રંગબેરંગી પતંગો અને 'કાપ્યો છે' ના ગુંજતા નારાઓ વચ્ચે પાદરામાં પક્ષીઓ માટે ઉત્તરાયણનો તહેવાર કાળ સાબિત થયો છે. પાદરા શહેર અને આસપાસના વિસ્તારોમાં પતંગની જીવલેણ દોરીના કારણે અનેક નિર્દોષ પક્ષીઓ લોહીલુહાણ થયા હોવાની ઘટનાઓ સામે આવી છે.
પક્ષીઓના મોત
મળતી માહિતી અનુસાર, ઉત્તરાયણના પર્વ દરમિયાન આકાશમાં પતંગબાજીની મજા માણતા લોકોની દોરી પક્ષીઓ માટે ફાંસો બની ગઈ હતી. પાદરામાં પતંગની ધારદાર દોરીની લપેટમાં આવવાથી અત્યાર સુધીમાં અંદાજે 8 જેટલા નિર્દોષ પક્ષીઓના કરુણ મોત નીપજ્યા છે. આ પક્ષીઓ દોરીથી કપાઈને જમીન પર પટકાયા હતા, જેમના જીવ બચાવી શકાયા ન હતા.
