Recipe: વધેલા ભાતને ફેંકો નહીં, વરસાદી સીઝનમાં બનાવી લો ગરમાગરમ નાસ્તો

• નાસ્તામાં મૂઠિયા પરિવારને આવશે પસંદ
  
• વરસાદી સીઝનમાં કોઈ પણ સમયે મૂઠિયા બેસ્ટ ઓપ્શન
• ઓછા તેલની મદદથી બનતા હોવાથી હેલ્થ માટે પણ બેસ્ટ

ઘણીવાર રસોઇ બનાવતા શક્ય છે કે ખાવાનું થોડું વધારે બની જાય અથવા તો કોઇનો ખાવાનો મૂડ ના હોય તો કોઇ ઓછું ખાઇ લે અને વસ્તુ બચી જાય. આજે આપણે વાત કરી રહ્યા છીએ ભાતની. જેને વધે ત્યારે ફેંકી દેવાના બદલે તમે તેનો હેલ્ધી નાસ્તો તૈયાર કરી શકો છો. તો જાણો કયો છે આ નાસ્તો અને તે કેટલો ઝડપથી તૈયાર થઈ જાય છે.

ભાતના મૂઠિયા

સામગ્રી

-ચાર કપ ભાત

-અડધી ટીસ્પૂન લાલ મરચું પાવડર

-અડધી ટીસ્પૂન હળદર

-એક ટીસ્પૂન ધાણા પાવડર

-ત્રણ ટીસ્પૂન ખાંડ

-એક ટીસ્પૂન આદુની પેસ્ટ

-એક ટીસ્પૂન લસણની પેસ્ટ

-એક ટીસ્પૂન તેલ

-અડધો કપ દહીં

-પોણો કપ હાંડવાનો લોટ

વઘાર માટે

-એક ટીસ્પૂન રાઈ

-એક ટીસ્પૂન તલ

-એક નંગ સૂકું લાલ મરચું

-એક ચપટી હિંગ

બનાવવાની રીત

સૌપ્રથમ એક બાઉલમાં બધા જ મસાલા ભેગા કરો. હવે તેમાં દહીં નાંખીને બરાબર મિક્સ કરો. ત્યારબાદ હાંડવાનો લોટ નાંખતા જાઓ અને લોટ બાંધો. ત્યારબાદ તેમાંથી મૂઠિયા તૈયાર કરી લો. હવે મૂઠિયાને કૂકરમાં બાફવા માટે મૂકો. બફાઈ જાય એટલે તેને ઠંડા કરો. આ પછી તેને કટ કરી લો. ત્યારબાદ વઘારની તૈયારી કરો. સૌપ્રથમ વઘારિયામાં તેલ ગરમ કરવા માટે મૂકો. તેલ ગરમ થાય એટલે તેમાં રાઈ અને તલ ઉમેરો. રાઈ ફૂટે એટલે તેમાં હિંગ અને મીઠો લીમડો નાંખીને અડધી મિનિટ માટે સાંતળો. હવે તેમાં મૂઠિયા નાંખીને થોડીવાર માટે સાંતળીને ગેસ બંધ કરો. છેલ્લે ચટણી સાથે સર્વ કરો.