શિયાળામાં બનાવો આ ખાસ કઢી, ટેસ્ટ એવો કે નહીં ભૂલાય સ્વાદ

• રોટલા અને ભાત સાથે આ કઢી લાગશે મસ્ત
  
• સામાન્ય કઢીની જેમ સરળતાથી ઘરે બનશે કઢી
• બાળકોથી માંડીને મોટેરાંઓને શિયાળામાં આ સ્વાદ ગમશે

શિયાળો આવે એટલે માર્કેટમાં લીલા શાકની ભરમાર જોવા મળે. ભાજીઓથી માંડીને ચણા અને ગાજર પણ માર્કેટમાં મોટા પ્રમાણમાં મળી રહ્યા છે. તમે તેમાંથી વિવિધ વાનગીઓ પણ બનાવતા હશે. શિયાળઆમાં મકાઈના રોટલા અને બાજરીના રોટલા પણ તમે બનાવતા હશો તો હવે ટ્રાય કરો લીલા ચણાની આ નવી વાનગી. હા, તમે લીલા ચણામાંથી કઢી બનાવી શકો છો. તેનો સ્વાદ ટેસ્ટી રહે છે. તમે તેને રોટલા અને ભાત સાથે પીરસી શકો છો. જો કે આ કઢી બનાવવા તમારે કોઈ ખાસ પ્રયાસ કરવાના નથી. સામાન્ય કઢીની જેમ તમે તેને ઘરે સરળતાથી બનાવી શકો છો.

લીલા ચણાની કઢી

સામગ્રી

• 1 વાટકી શેકેલા લીલા ચણા
• 1/2 વાટકી ચણાનો લોટ
• 11/2 ટેબલ સ્પૂન આદું-મરચાં-લસણની પેસ્ટ
• 2 ચમચી બારીક સમારેલી કોથમીર
• 1 તમાલપત્ર
• 2 લવિંગ
• 1 તજનો નાનો ટુકડો
• 1 નાની ચમચી ગરમ મસાલો
• 4 થી 5 નંગ લીમડાના પાન
• થોડી ખાંડ
• મીઠુ સ્વાદ પ્રમાણે

રીત

સૌથી પહેલા લીલા ચણાને ફોલી લો અને તેને અધકચરા વાટી લો. હવે એક કઢાઈ લો અને તેમાં ઘી ગરમ કરો. હવે તેમાં તમાલપત્ર, લવિંગ, તજના ટુકડા, લીમડાના પાન, રાઈ, જીરુ વગેરે નાંખી વઘાર કરી લો. ત્યારબાદ આદુ લસણ અને મરચાની પેસ્ટ ઉમેરો. હવે ધાણાજીરુ, મીંઠુ અને અન્ય મસાલા ઉમેરો. થોડું પાણી નાંખી ઉકાળો. દહીં વલોવી તેમાં શેકેલો ચણાનો લોટ ઉમેરો. તેને પણ કઢાઈમાં ઉમેરો. આ પછી વાટેલા લીલા ચણાને ગ્રેવીમાં નાંખી દો. કઢી સારી રીતે ઉકળે અને તેમાંથી સુગંધી આવે એટલે તેમાં લીલીછમ કોથમીર પણ ઉમેરો. બરોબર ઉકેળે એટલે ઉતારીને એક વાસણમાં કાઢી લો. તૈયાર ગરમાગરમ કઢીને રોટલા અને ભાત સાથે માણો.