ચોમાસામાં બનાવો લાઈટ અને હેલ્ધી ડિનર, પ્રોટીનથી ભરપૂર ગુજરાતી વાનગી કરશે મદદ

• ગરમાગરમ ડિશ આપશે મજા
  
• દાળ ઢોકળીનો સ્વાદ લાગે છે મસ્ત
• એકલ દોકલ વાનગીમાં છે બેસ્ટ

જો તમે એકની એક દાળ અને ભાત ખાઈને કંટાળ્યા છો તો તમે ડિનરમાં કંઈક નવુ અને ગરમાગરમ પ્લાન કરી શકો છો. આ માટે જો તમે કંઈ એકલ દોકલ વાનગી પસંદ કરવાનું વિચારો છો તો તમે દાળ ઢોકળી પ્લાન કરી શકો છો. તે નાના બાળકોથી લઈને મોટેરાંઓને પસંદ આવે છે. તો જાણો કઈ રીતે ઘરે ફટાફટ આ ટેસ્ટી અને હેલ્ધી દાળ ઢોકળી બનાવી શકાશે.

દાળ ઢોકળીની રેસિપિ

સામગ્રી

ઢોકળી માટે

- એક કપ ઘઉંનો લોટ

- એક ટીસ્પૂન લાલ મરચું પાવડર

- અડધી ટીસ્પૂન જીરું

- અડધી ટીસ્પૂન ગરમ મસાલો

- એક ટીસ્પૂન ઘી

- મીઠું સ્વાદાનુસાર

- પાણી જરૂર મુજબ

દાળ માટે

- અડધો કપ તુવેર દાળ

- અડધો કપ મગની દાળ

- એક ટેબલસ્પૂન ઘી

- અડધી ટીસ્પૂન રાઈ

- પા ટીસ્પૂન જીરૂં

- અડધી ટીસ્પૂન ગરમ મસાલો

- એક નંગ ડુંગળી

- એક નંગ ટામેટું

- અડધી ટીસ્પૂન લાલ મરચું પાવડર

- અડધી ટીસ્પૂન હળદર

- મીઠું સ્વાદાનુસાર

ગાર્નિશીંગ માટે

- કોથમીર ઝીણી સમારેલી

રીત

સૌપ્રથમ ઘઉંના લોટને એક મોટા મિક્સિંગ બાઉલમાં ચાળી લો. તેમાં લાલ મરચું પાવડર, ગરમ મસાલો, મીઠું અને જીરું ઉમેરીને બરાબર મિક્સ કરી લો. હવે તેમાં મોણ માટે ઘી ગરમ કરીને ઉમેરો. બરાબર મિક્સ કરી લો. ત્યારબાદ જરૂર પૂરતું પાણી ઉમેરીને ઢોકળી માટેનો લોટ બાંધી લો. હવે આ કણકમાંથી નાની-નાની હાથેથી ઢોકળી તૈયાર કરો. હવે આ ઢોકળીને ઢાંકીને મૂકી દો. દાળને સરસ રીતે ધોઈને બે કલાક પહેલા પલાળી દેવી. તેને નીતારીને ચાર કપ પાણી, હળદર અને થોડું મીઠું ઉમેરીને બાફી લો. બરાબર બફાઈ જાય એટલે તેને વલોવી લો. હવે એક જાડા તળિયાવાળી તપેલી અથવા તો કડાઈમાં ઘી ગરમ કરો. ગરમ થાય એટલે તેમાં રાઈ અને જીરું ઉમેરો. રાઈ તતડે એટલે તેમાં ઝીણા સમારેલા ડુંગળી અને ટામેટાં ઉમેરીને સાંતળો. ડુંગળી લાઈટ બ્રાઉન રંગની થાય ત્યાં સુધી સાંતળો. ત્યાર બાદ તેમાં બાફેલી દાળ ઉમેરીને બરાબર મિક્સ કરી લો. હવે તેમાં ગરમ મસાલો અને લાલ મરચું પાવડર ઉમેરીને ઉકળવા દો. હવે તેમાં તૈયાર કરેલી ઢોકળી ઉમેરીને ચઢવા દો. પંદરથી વીસ મિનિટ સુધી ઉકળવા દો. ઢોકળી એક એક કરીને ઉમેરવી જેથી ચોંટે નહીં. બધી જ સામગ્રી એકરસ થઈ જાય અને ઢોકળી પણ ચઢી જાય એટલે ગેસ બંધ કરીને તેને કોથમીરથી ગાર્નિશ કરી લો. ગરમા-ગરમ ઢોકળી સર્વ કરો.