Dudh Pak Recipe : રાંધણછઠ્ઠના તહેવાર પર મીઠાઈમાં બનાવો શાહી દૂધપાકની વાનગી, શરીરને મળશે ઠંડક

દૂધપાક એક પરંપરાગત ભારતીય મીઠાઈ છે. અત્યારે તહેવારના દિવસો શરૂ થઈ ગયા છે. તહેવારો ભોજન પ્રસંગમાં દૂધપાકની વાનગી બને છે. આગામી દિવસોમાં ગુજરાતમાં રાંધણછઠ્ઠનો તહેવાર આવે છે. દૂધપાકની વાનગી બનાવી તમે આ તહેવારનો આનંદ માણી શકો છો.

દૂધપાક બનાવવા માટે સામગ્રી : આ દૂધપાકને શાહી વાનગી બનાવવા કાજુ બદામ, કેસર, ચારોળી અને જાયફળ પાઉડર લઈ શકો છો.

• 1 લીટર દૂધ
• 2 ચમચી ચોખા
• 5 ચમચી ખાંડ
• 1 ચમચી ઇલાયચી પાઉડર

દૂધપાક બનાવવા માટેની રીત :

• આ વાનગી બનાવવા સૌ પ્રથમ આપેલ માપ મુજબ એક વાસણમાં ચોખા કૂક કરી દો. અને બીજી બાજુ એક વાસણ અથવા કઢાઈમાં ચારેબાજુ ઘી લગાવ્યા બાદ તેમાં એક લીટર દૂધ ઉમેરો. દૂધનો થોડો રંગ બદલાય અને થોડું ગાઢ થાય એટલે તેમાં ખાંડ નાખો.
• ખાંડ દૂધમાં નાખતા જ પાણી છૂટવા લાગશે અને દૂધ પાતળું થશે. એટલે ફરી દૂધને થોડો સમય સુધી ઉકાળી ઘટ્ટ થવા દો. દૂધ ઘટ્ટ થયું છે કે તેની ચકાસણી કરવા તમે તાવેતાને ઉકળતા દૂધમાં બોળી બહાર કાઢી પછી આંગળીનો લસરકો મારી ચેક કરી શકશો.
• દૂધ ઉકળી જાય એટલે તેમાં તેમાં ઇલાયચી અને જાયફળ પાઉડર નાખો. પછી મનપસંદ ડ્રાય ફ્રુટ નાખો. જો તમે રાધંણછઠ્ઠ માટે આ રેસીપી બનાવો તો રાત્રે ફ્રિજમાં મૂકી દો. જેથી બીજા દિવસે ઉપયોગમાં લઈ શકાય.

કેમ બનાવાય છે દૂધપાક

દૂધપાકએ દૂધ , ખાંડ અને ચોખામાંથી બનતી સ્વાદિષ્ટ ભારતીય મીઠાઇ છે. જે પ્રાકૃતિક રીતે ઠંડી હોવાથી તે શરીરમાં રહેલા પિત્ત નું શમન કરે છે અને પોષણ આપે છે. ખાસ કરીને ગુજરાતમાં આ વાનગી ભાદરવા મહિનામાં ઘેર-ઘેર બને છે. ભાદરવા મહિના માં ખૂબજ આકરો તાપ પડવાને કારણે શરીરમાં વધતી ગરમીનું શમન કરવા દૂધ પીવામાં આવે છે. અને એટલે જ આ દિવસોમાં દૂધપાક બને છે.