અમદાવાદમાં સ્થાનિક સ્વરાજ્યની ચૂંટણીના મતદાન દરમિયાન દાણીલીમડા વિસ્તારમાં ગંભીર હિંસાની ઘટના સામે આવી છે. દાણીલીમડામાં આવેલી MS પબ્લિક શાળામાં મતદાન ચાલી રહ્યું હતું તે દરમિયાન અચાનક બે જૂથો સામસામે આવી ગયા હતા. આ બોલાચાલી જોતજોતામાં ઉગ્ર મારામારીમાં ફેરવાઈ ગઈ હતી. આ અથડામણના કારણે મતદાન મથક પર અફડાતફડી મચી ગઈ હતી અને અન્ય મતદારોમાં ભયનો માહોલ જોવા મળ્યો હતો. ઘટનાની ગંભીરતાને જોતા વધારાનો પોલીસ કાફલો તાત્કાલિક સ્થળ પર રવાના કરવામાં આવ્યો હતો.
ભાજપ ઉમેદવાર વિનોદ ચંદ્ર પરમાર પર હુમલો
આ હિંસક ઘર્ષણ દરમિયાન દાણીલીમડા વોર્ડના ભાજપના ઉમેદવાર વિનોદ ચંદ્ર પરમારને ગંભીર ઈજાઓ પહોંચી છે. મળતી માહિતી મુજબ, ઘર્ષણ વખતે થયેલા હુમલાને કારણે વિનોદ ચંદ્ર પરમાર સ્થળ પર જ બેભાન થઈ ગયા હતા. તેમની હાલત નાજુક જણાતા તેમને તાત્કાલિક અસરથી મણિનગરની LG હોસ્પિટલ ખાતે સારવાર માટે ખસેડવામાં આવ્યા છે. હોસ્પિટલ ખાતે ભાજપના અન્ય અગ્રણીઓ અને કાર્યકરો પણ મોટી સંખ્યામાં ઉમટી પડ્યા છે, જેના પગલે હોસ્પિટલ પરિસરમાં પણ પોલીસ બંદોબસ્ત વધારી દેવામાં આવ્યો છે.
