દેવભૂમિ દ્વારકા જિલ્લાના ભાણવડ તાલુકામાં ચૂંટણી પૂર્વે જ રાજકીય માહોલ ગરમાયો છે. પોલીસ દ્વારા કોંગ્રેસના બે સક્રિય કાર્યકરો સામે ચેપ્ટર કેસ નોંધી અટકાયતી પગલાં લેવામાં આવતા સ્થાનિક રાજકારણમાં ખળભળાટ મચી ગયો છે. આ ઘટનાને પગલે કોંગ્રેસ છાવણીમાં ભારે રોષ જોવા મળી રહ્યો છે.
પરિવારના સભ્યો સામે પોલીસ કાર્યવાહી
મળતી માહિતી મુજબ, જે કાર્યકરોની અટકાયત કરવામાં આવી છે તેમાં જિલ્લા પંચાયત બેઠકના ઉમેદવારના ભાઈ અને તાલુકા પંચાયત બેઠકના ઉમેદવાર પુત્રનો સમાવેશ થાય છે. ચૂંટણીના નિર્ણાયક સમયે જ પોલીસ દ્વારા આ પ્રકારની કાર્યવાહી કરવામાં આવતા કોંગ્રેસે તેને 'સત્તાનો દુરુપયોગ' ગણાવ્યો છે. કાર્યકરોનું કહેવું છે કે ચૂંટણીમાં ડરનું વાતાવરણ ઊભું કરવા અને પ્રચારમાં અવરોધ લાવવા માટે જ આ પગલાં લેવાયા છે.
