મહીસાગર જિલ્લાના મુખ્ય મથક લુણાવાડામાં પેટાચૂંટણીના મતદાનના આડે હવે ગણતરીના કલાકો બાકી છે, ત્યારે જ શહેરમાં રહસ્યમય પોસ્ટરો લાગતા રાજકીય ગરમાવો વ્યાપી ગયો છે. લુણાવાડા નગરપાલિકાના વોર્ડ નંબર-5ની પેટાચૂંટણી પૂર્વે ફુવારા ચોક સહિતના વિસ્તારોમાં અજાણ્યા શખ્સો દ્વારા વિવાદાસ્પદ પોસ્ટરો લગાવવામાં આવ્યા છે, જેને પગલે અનેક તર્ક-વિતર્ક સર્જાયા છે.
દાદાગીરી અને અન્યાયનો અંત લાવવા હાકલ
લુણાવાડાના ફુવારા ચોક અને વોર્ડ નંબર-5ના વિવિધ વિસ્તારોમાં રાતોરાત લાગેલા આ પોસ્ટરોમાં ગંભીર આક્ષેપો કરવામાં આવ્યા છે. પોસ્ટરમાં સ્પષ્ટ શબ્દોમાં લખવામાં આવ્યું છે કે, "ખોટી લુખ્ખાગીરી અને દાદાગીરીનો અંત લાવો" તેમજ "અન્યાયનો અંત લાવો". આ પોસ્ટરોએ સ્થાનિક રાજકારણમાં ખળભળાટ મચાવી દીધો છે. આડકતરી રીતે કોઈ ચોક્કસ વ્યક્તિ કે જૂથ સામે નિશાન સાધવામાં આવ્યું હોય તેવું ચર્ચાઈ રહ્યું છે.
