Gujarat Local Body Election Results 2026: સુરતમાં ભાજપનું વિજયી વાવાઝોડું, સી.આર. પાટીલે કહ્યું , અહંકારી પાર્ટીઓને જનતાએ ઘરભેગી કરી

ગુજરાત સ્થાનિક સ્વરાજની ચૂંટણી 2026 ના પરિણામોમાં ભારતીય જનતા પાર્ટીએ ફરી એકવાર અજેય દબદબો સાબિત કર્યો છે. ખાસ કરીને સુરત મહાનગરપાલિકામાં ભાજપે તમામ ગણિતો ઉંધા પાડીને અત્યાર સુધી 115 બેઠકો પર જીત મેળવી ઐતિહાસિક સફળતા હાંસલ કરી છે.

સી.આર. પાટીલનો વિરોધ પક્ષો પર પ્રહાર

ઐતિહાસિક જીત બાદ કેન્દ્રીય જળ શક્તિ મંત્રી સી.આર. પાટીલે સુરત અને રાજ્યના મતદારોનો આભાર માનતા જણાવ્યું હતું કે, આજે સુરત અને આખા ગુજરાતની જનતાના આશીર્વાદ ભાજપને મળ્યા છે. કેટલીક પાર્ટીઓ એવું ભ્રમમાં હતી કે જનતા તેમના ખિસ્સામાં છે, પરંતુ આજે પરિણામોએ એ તમામ અહંકારી પાર્ટીઓને ઘરભેગી કરી દીધી છે. 'આપ' હોય કે કોંગ્રેસ, જનતાએ બંનેને સબક શીખવાડ્યો છે.

સુરતનું બદલાયેલું સમીકરણ

વર્ષ 2021ની ચૂંટણીમાં ભાજપને 93 બેઠકો મળી હતી અને આમ આદમી પાર્ટી 27 બેઠકો સાથે મજબૂત વિપક્ષ તરીકે ઉભરી હતી. જોકે, આ વખતે ચિત્ર બદલાયું છે. 'આપ' માત્ર 4 બેઠકો પર સમેટાઈ ગઈ છે. પાટીલે ઉમેર્યું કે, "આ 4 બેઠકો પણ આવવી જોઈતી નહોતી, છતાં જે મતદારોએ તેમને મત આપ્યા છે અમે તેમની સાથે વાત કરીશું અને તેમના કામ પણ કરીશું." બીજી તરફ કોંગ્રેસે 5 વર્ષના લાંબા વિરામ બાદ માંડ 1 બેઠક પર ખાતું ખોલાવ્યું છે.

મિની સૌરાષ્ટ્રમાં કેસરીયો

સુરતના મિની સૌરાષ્ટ્ર ગણાતા વિસ્તારોમાં પણ ભાજપનો એકચક્રી શાસન જોવા મળ્યું છે. જનતાના અતૂટ વિશ્વાસ બદલ આભાર માનતા પાટીલે કહ્યું કે, આ મોટી જવાબદારી છે અને જનતાનો ભરોસો અમે ક્યારેય તૂટવા નહીં દઈએ.

આ પણ વાંચો----    Bharuch : ઝઘડિયા GIDC આગ દુર્ઘટનામાં કામદારનું મોત, ચૈતર વસાવા અને મૃતકના પરિવારજન વચ્ચે સામ સામે લાફાવાળી