લોકશાહીના પર્વની ઉજવણીમાં આજે સુરતના ઓલપાડમાં એક હૃદયસ્પર્શી દ્રશ્ય જોવા મળ્યું હતું. સ્થાનિક સ્વરાજ્યની સુરત જિલ્લા અને તાલુકા પંચાયતની ચૂંટણીના ઉત્સાહ વચ્ચે એક નવદંપતીએ લગ્નના ફેરા ફરતા પહેલા પોતાના મતાધિકારનો ઉપયોગ કરી સૌના દિલ જીતી લીધા હતા.
લગ્નના પવિત્ર બંધન પહેલા નાગરિક ધર્મ નિભાવ્યો
ઓલપાડની શિવાલીક સોસાયટીમાં રહેતા પાટીલ પરિવારના પુત્ર જય પાટીલ અને તેમની થનારી પત્ની લક્ષ્મી સંભાળે આજે જીવનના નવા સફરની શરૂઆત કરવા જઈ રહ્યા છે. આજે જ તેમના લગ્ન હોવા છતાં, બંનેએ લગ્નવિધિમાં વ્યસ્ત રહેવાને બદલે સૌ પ્રથમ મતદાન મથકે જઈને મતાધિકારનો ઉપયોગ કરવાનું નક્કી કર્યું હતું.
