- પાકિસ્તાન સામેની મેચ સાથે ડેવિડ વોર્નરની કારકિર્દીનો અંત થયો
- ક્રિકેટ ઓસ્ટ્રેલિયાએ લોકોને ગ્રાઉન્ડમાં જવાની મંજૂરી આપી
- પ્રેક્ષકો પોડિયમ પાસે કતારમાં ઊભા રહ્યાં હતા
આંતરરાષ્ટ્રીય ક્રિકેટમાં આવું ભાગ્યે જ બન્યું છે, જ્યારે કોઈ ખેલાડીની છેલ્લી મેચ બાદ દર્શકો સ્ટેડિયમના સ્ટેન્ડ પરથી મેદાનમાં પહોંચ્યા હોય. આવું જ કંઈક શનિવારે સિડની ક્રિકેટ ગ્રાઉન્ડ પર જોવા મળ્યું. પાકિસ્તાન સામેની મેચ સાથે ડેવિડ વોર્નરની કારકિર્દીનો અંત થયો હતો. વોર્નર હવે રમતો જોવા નહીં મળે. મેચ બાદ હજારો દર્શકો પોતાના હીરોને જોવા મેદાનમાં પહોંચ્યા હતા. ક્રિકેટ ઓસ્ટ્રેલિયાએ લોકોને ગ્રાઉન્ડમાં જવાની મંજૂરી આપી હતી.
વોર્નર માટે ભાવનાત્મક સમય
પ્રેક્ષકો પોડિયમ પાસે કતારમાં ઊભા રહ્યાં હતા. તે દરેક માટે ભાવનાત્મક ક્ષણ હતી. વોર્નર માટે પણ તે ભાવનાત્મક સમય હતો. જ્યારે તેને પૂછવામાં આવ્યું કે તેને હવે કેવી રીતે યાદ કરવામાં આવે. આના પર તેમની તરફથી એક મજેદાર જવાબ આવ્યો. વોર્નરે કહ્યું કે હું મારી રમતથી લોકોના ચહેરા પર સ્મિત લાવવામાં સફળ રહ્યો છું, મને એક ઉત્સાહી અને મનોરંજક ખેલાડી તરીકે યાદ રાખવો જોઈએ. તેણે ટેસ્ટ ક્રિકેટને સૌથી મનોરંજક ગણાવ્યું હતું. આ સિવાય વોર્નરે આ સફરમાં પરિવારને પણ મહત્વનો ભાગ ગણાવ્યો હતો.
પરિવારનો માન્યો આભાર
વોર્નરે તેની ક્રિકેટ સફરમાં સાથ આપવા બદલ તેના માતા-પિતા, ભાઈ અને પત્નીનો આભાર માન્યો હતો. તેણે કહ્યું કે હું આ બધાને ખૂબ પ્રેમ કરું છું. આ વિશે વધુ કહું તો ભાવુક થઈ જઈશ. તેણે ખાસ કરીને તેની પત્ની કેન્ડિસનો આભાર માન્યો.
પાકિસ્તાન સામેની ટેસ્ટમાં ઓસ્ટ્રેલિયાની જીત
ઓસ્ટ્રેલિયાએ સિડની ટેસ્ટ મેચમાં પાકિસ્તાનને 8 વિકેટના મોટા અંતરથી હરાવ્યું અને શ્રેણી 3-0થી જીતી લીધી. વોર્નર તેની છેલ્લી ઇનિંગ દરમિયાન ચમક્યો હતો અને 57 રનની શાનદાર ઇનિંગ રમીને આઉટ થયો હતો. તેણે પોતાની ઇનિંગમાં કુલ 7 ચોગ્ગા ફટકાર્યા હતા. મેચ દરમિયાન વોર્નરનો પરિવાર હાજર હતો. સિડની ટેસ્ટના અંતિમ દિવસે લંચ માટે જતા સમયે ડેવિડ વોર્નરે એક ચાહકને પોતાના ગ્લોવ્ઝ પણ ગિફ્ટ કર્યા હતા.
