અફઘાન સ્પિનર રાશિદ ખાન ફરી એકવાર IPL 2026માં પોતાના ઘાતક સ્પિનથી બેટ્સમેન માટે કોયડો બની ગયો છે. જયપુરમાં રાજસ્થાન રોયલ્સ સામેની મેચમાં ગુજરાત ટાઈટન્સ માટે આ સ્ટાર ઓલરાઉન્ડરે ધૂમ મચાવી હતી.

દિગ્ગજ સ્પિનરો સુનીલ નારાયણ અને રવિન્દ્ર જાડેજાને પણ પાછળ છોડી દીધા હતા. રાશિદ ખાનની ઘાતક બોલિંગના બળ પર ગુજરાત ટાઈટન્સે રાજસ્થાન રોયલ્સને 77 રને હરાવીને શાનદાર જીત નોંધાવી હતી.

રાશિદના સ્પિનથી ફસાયા રાજસ્થાનના બેટ્સમેન

સવાઈ માનસિંહ સ્ટેડિયમ ખાતે રમાયેલી આ મેચમાં ગુજરાત ટાઈટન્સે પહેલા બેટિંગ કરી અને મોટો સ્કોર બનાવ્યો. ત્યારબાદ રાશિદ ખાને મેચનો રસ્તો સંપૂર્ણપણે બદલી નાખ્યો. તેને 4 ઓવરના સ્પેલમાં 33 રન આપીને 4 મહત્વપૂર્ણ વિકેટ લીધી. તેની શાનદાર બોલિંગ સામે રાજસ્થાનના બેટ્સમેનોએ સંઘર્ષ કર્યો.

આ શાનદાર પ્રદર્શન સાથે રાશિદ ખાન IPL ઈતિહાસમાં સૌથી વધુ ત્રણ વિકેટ લેનારા સ્પિનરોના લિસ્ટમાં બીજા સ્થાને પહોંચી ગયો છે. IPLમાં આ તેની 18મી 3 વિકેટ હતી. તેને સુનીલ નારાયણ, અમિત મિશ્રા અને રવિન્દ્ર જાડેજાને પાછળ છોડી દીધા, તેઓ દરેકે 17 વખત 3 વિકેટ લીધી છે. હવે આ લિસ્ટમાં ફક્ત મહાન ભારતીય સ્પિન બોલર યુઝવેન્દ્ર ચહલ જ આગળ છે, જેને 23 વખત 3 વિકેટ લીધી છે.

IPLમાં સૌથી વધુ 3 વિકેટ લેનારા સ્પિન બોલરો

23 – યુઝવેન્દ્ર ચહલ

18 - રાશિદ ખાન

17 – સુનીલ નારાયણ

17 - અમિત મિશ્રા

17 – રવિન્દ્ર જાડેજા

રાશિદ બન્યો પ્લેયર ઓફ ધ મેચ

મેચ પછી રાશિદ ખાનને તેના શાનદાર પ્રદર્શન માટે પ્લેયર ઓફ ધ મેચ જાહેર કરવામાં આવ્યો. એવોર્ડ મેળવ્યા પછી તેને કહ્યું કે તેને ફેંકેલા પહેલા જ બોલથી તેને સમજાયું કે પિચ સ્પિન બોલરો માટે મદદરૂપ છે.

રાશિદે કહ્યું કે "મેં પહેલો બોલ ફેંકતાની સાથે જ મને સમજાયું કે આ વિકેટ તેમના માટે ઘણી મદદ કરે છે. તેનું ધ્યાન યોગ્ય લાઈન અને લેન્થ બોલિંગ અને ગતિમાં ફેરફાર કરવા પર હતું. જો તમે સ્ટમ્પ લાઈન છોડશો નહીં, તો બેટ્સમેન માટે રન બનાવવા મુશ્કેલ બની જાય છે."

ગુજરાત ટાઈટન્સ પ્લેઓફની દોડમાં પોતાનું સ્થાન મજબૂત કરવા માટે પ્રયત્નશીલ છે ત્યારે રાશિદ ખાને શાનદાર પ્રદર્શન કર્યું છે. તેની બોલિંગે ટીમની મોટી જીતમાં મુખ્ય ભૂમિકા ભજવી હતી, જે ફરી એકવાર સાબિત કરે છે કે તેને વિશ્વના સૌથી ખતરનાક T20 સ્પિનરોમાંના એક તરીકે કેમ ગણવામાં આવે છે.

આ પણ વાંચો: BCCIએ શુભમન ગિલને નવા T20 કેપ્ટન તરીકે કર્યો નિયુક્ત, સૂર્યકુમાર યાદવ પાસેથી છીનવાઈ કેપ્ટનશીપ?