- સૂર્યકુમાર અને બુમરાહની વધશે મુશ્કેલીઓ
- હાર્દિકને ટીમનો નવો કેપ્ટન બનાવાય તેવી શક્યતાઓ વધુ
- લીડરશીપનો રોલ ખોવવાની શક્યતાથી 2 ખેલાડીઓ થશે નાખુશ
આઈપીએલના ઈતિહાસમાં સૌથી ચોંકાવનારા સમાચાર સામે આાવ્યા છે. મુંબઈ ઈન્ડિયન્સથી પોતાની કરિયરની શરૂઆત કરનારા હાર્દિક પંડ્યા ફરીથી આ ફ્રેન્ચાઈઝીમાં આવી ગયા છે. ગુજરાતમાં સતત 2 વર્ષ લીડરશીપમાં ચમક્યા બાદ હાર્દિકે પોતાના ઘરે વાપસી કરી છે. તેના પરત આવવાના કારણે ટીમ મેનેજમેન્ટ અને ફેન્સ ઘણા ખુશ છે પણ ટીમના 2 ખેલાડીઓ છે જેમને માટે આ સારા સમાચાર નથી.
2015થી કરી હતી શરૂઆત
હાર્દિક પંડ્યાએ 2015માં મુંબઈ ઈન્ડિયન્સે પોતાની સફર શરૂ કરી હતી. આ ફ્રેન્ચાઈઝીને માટે રમીને પોતાની ઓળખ બનાવી અને ટીમ ઈન્ડિયાને માટે એક સારા ભારતીય ઓલરાઉન્ડરની ખામી પણ પૂરી કરી. 6 સીઝન સુધી આ ફ્રેન્ચાઈઝીમાં રહ્યા બાદ તેઓએ ગુજરાતની મદદ લીધી અહીં ક્રિકેટિંગ સ્કીલ્સની સાથે કેપ્ટનશીપ કરી. પહેલી સીઝનમાં ખિતાબ જીત્યો અને ફાઈનલમાં પણ તેની કેપ્ટનશીપની બોલબાલા રહી.
આ 2 ખેલાડીઓ માટે ખરાબ સમાચાર
પહેલેથી જ ખાસ ઓલરાઉન્ડર અને હવે નેતૃત્વના ગુણો સાથે હાર્દિક પંડ્યા મુંબઈ ઈન્ડિયન્સમાં વાપસી કરી રહ્યો છે. આ સાથે 5 વખતની ચેમ્પિયન ફ્રેન્ચાઇઝી ફરીથી પહેલાની જેમ શક્તિશાળી બની જશે. આમ છતાં તે ફ્રેન્ચાઇઝીના બે સૌથી મહત્વપૂર્ણ ખેલાડીઓને અસર કરશે. જેમના માટે હાર્દિકની વાપસી એક તૂટેલા સ્વપ્ન સમાન છે. આ બે ખેલાડીઓ છે સૂર્યકુમાર યાદવ અને જસપ્રિત બુમરાહ. છેલ્લી બે સિઝનમાં મુંબઈ પાસે સૂર્યકુમાર યાદવ અને જસપ્રિત બુમરાહના રૂપમાં રોહિતના અનુગામી તરીકે બે વિકલ્પો હતા. IPL 2023માં સૂર્યાએ પ્રથમ એક કે બે મેચમાં રોહિતની ગેરહાજરીમાં કમાન સંભાળી હતી. બુમરાહને પણ આ તક મળી શકી હોત પરંતુ તે ઈજાના કારણે આખી સિઝનમાંથી બહાર હતો. આવી સ્થિતિમાં જો હાર્દિક પરત ન ફર્યો હોત તો આ બેમાંથી એક અથવા બંનેને નેતૃત્વની ભૂમિકા મળી હોત તે નિશ્ચિત હતું, જે હવે મુશ્કેલ જણાય છે.
શું મળશે હાર્દિકને કેપ્ટનશીપ
વાસ્તવમાં હાર્દિકના મુંબઈ પરત ફરવાનો સીધો અર્થ એ છે કે તે રોહિત શર્મા પછી ટીમનો આગામી કેપ્ટન હશે. હાર્દિક અત્યાર સુધી માત્ર ગુજરાતનો કેપ્ટન જ હતો, તે ફ્રેન્ચાઈઝીનો ચહેરો પણ હતો. ઉપરાંત, કેપ્ટનશિપની સફળતાએ તેને વધુ ઊંચાઈઓ પર લઈ ગયો. દેખીતી રીતે હાર્દિકે આ બધું છોડી દીધું હોવું જોઈએ જેથી તેને લીગની સૌથી સફળ ટીમનું સંચાલન કરવાની તક મળી શકે. આવી સ્થિતિમાં જ્યારે પણ રોહિત શર્મા સુકાની પદ છોડવાનો નિર્ણય લેશે તો સ્વાભાવિક રીતે હાર્દિકને જવાબદારી મળી જશે. આવી સ્થિતિમાં બુમરાહ અને સૂર્યા હાર્દિકની વાપસીથી નારાજ હોય તો નવાઈ નહીં.
