INDvsAUS: વિજળી વિભાગે સ્ટેડિયમનું કનેક્શન કાપ્યું, અંધારામાં કેવી રીતે રમાશે મેચ?

• કનેક્શન વગર મેચ યોજવા પર તંત્ર શંકાના દાયરામાં
  
• કનેક્શન કપાવવા માટે PWD અને રમતગમત વિભાગ જવાબદાર
• જનરેટરની મદદથી કરાશે લાઇટ્સ

ઓસ્ટ્રેલિયાની ક્રિકેટ ટીમ હાલમાં પાંચ મેચની T20 સિરીઝ રમવા માટે ભારતના પ્રવાસે છે. આ સિરીઝની ચોથી મેચ આજે રાયપુરના શહીદ વીર નારાયણ સિંહ ઈન્ટરનેશનલ સ્ટેડિયમમાં રમાવાની છે. નવાઈની વાત એ છે કે આજે જે સ્ટેડિયમમાં ભારત અને ઓસ્ટ્રેલિયા વચ્ચે મેચ રમાવાની છે ત્યાં જનરેટરની મદદથી અજવાળુ કરવામાં આવશે.

14 વર્ષથી નથી ચૂકવ્યુ વિજળીનું બિલ

એક અહેવાલ મુજબ સ્ટેડિયમ મેનેજમેન્ટે 2009થી એક પણ વીજળીનું બિલ ચૂકવ્યું નથી. આ બિલ કુલ રૂ. 3.16 કરોડનું છે. બીલ ન ભરવાના કારણે 5 વર્ષ પહેલા સ્ટેડિયમનું વીજ જોડાણ કાપી નાખ્યું હતું. છત્તીસગઢ સ્ટેટ ક્રિકેટ એસોસિએશનની વિનંતી પર કામચલાઉ જોડાણ સ્થાપિત કરવામાં આવ્યું હતું. પરંતુ આ જોડાણ માત્ર દર્શકોની ગેલેરી અને બોક્સને આવરી લે છે. જેના કારણે સ્ટેડિયમના કેટલાક ભાગોમાં વીજળી નથી. આજની મેચ દરમિયાન ફ્લડલાઈટ માટે જનરેટરની મદદ લેવી પડશે.

2018માં કપાયુ હતુ કનેક્શન

રાયપુર ગ્રામીણ વિભાગના પ્રભારી અશોક ખંડેલવાલનું કહેવું છે કે ક્રિકેટ એસોસિએશને સ્ટેડિયમના કામચલાઉ જોડાણની ક્ષમતા વધારીને 1000 કિલોવોલ્ટ કરવા માટે અરજી કરી છે. હાલમાં અસ્થાયી જોડાણની ક્ષમતા 200 કિલોવોલ્ટ છે. સ્ટેડિયમનું વીજળીનું કનેક્શન કાપવાનો મુદ્દો 2018માં પ્રકાશમાં આવ્યો હતો જ્યારે હાફ-મેરેથોનમાં ભાગ લેનારા એથ્લેટ્સે જાણ્યું કે સ્ટેડિયમમાં વીજળી નથી. જે બાદ કહેવામાં આવ્યું કે 2009 થી સ્ટેડિયમનું વીજળી બિલ ચૂકવવામાં આવ્યું નથી.

PWD અને રમતગમત વિભાગ જવાબદાર

સ્ટેડિયમના નિર્માણ પછી તેની જાળવણીની જવાબદારી જાહેર બાંધકામ વિભાગ (PWD) ને આપવામાં આવી હતી જ્યારે બાકીનો ખર્ચ રમતગમત વિભાગ દ્વારા ઉઠાવવાનો હતો. સ્ટેડિયમમાં પાવર કટ થયા બાદ બંને એકબીજા પર બિલ ન ભરવાનો આરોપ લગાવી રહ્યા છે. વીજકંપનીએ લેણાંની ચુકવણી માટે PWD અને રમતગમત વિભાગને અનેક વખત નોટિસ મોકલી છે પરંતુ હજુ સુધી ચૂકવણી કરવામાં આવી નથી. 2018 માં પાવર કનેક્શન કાપવામાં આવ્યું ત્યારથી, આ સ્ટેડિયમમાં ત્રણ આંતરરાષ્ટ્રીય ક્રિકેટ મેચ યોજાઈ છે.

છત્તીસગઢ સ્ટેટ ક્રિકેટ એસોસિએશનના મીડિયા કોઓર્ડિનેટર તરુણેશ સિંહ પરિહારનું કહેવું છે કે તેમને આ મામલે કોઈ માહિતી નથી. તેમને ખબર નથી કે કેટલું બિલ બાકી છે. તેમનું કહેવું છે કે એસોસિએશનો આંતરરાષ્ટ્રીય મેચો યોજવા અંગે શંકાસ્પદ છે. મોટી મેચો માટે, વૈકલ્પિક વ્યવસ્થા તરીકે જનરેટરનો ઉપયોગ કરવામાં આવે છે.