- T20 સિરીઝ માટે શ્રીલંકાની ટીમની જાહેરાત કરવામાં આવી
- ચરિથ અસલંકાને શ્રીલંકન ટીમનો કેપ્ટન બનાવવામાં આવ્યો
- શ્રીલંકાના એ ખેલાડી જેમનો ભારત સામેનો રેકોર્ડ ઘણો સારો
ભારત સાથેની T20 સિરીઝ માટે શ્રીલંકાની ટીમની જાહેરાત કરવામાં આવી છે. શ્રીલંકા ક્રિકેટ બોર્ડે 16 સભ્યોની ટીમની જાહેરાત કરી છે. ટીમમાં ઘણા ફેરફાર જોવા મળ્યા છે. આ સિરીઝ માટે ચરિથ અસલંકાને શ્રીલંકન ટીમનો કેપ્ટન બનાવવામાં આવ્યો છે. આ સિવાય 3 એવા ખેલાડીઓને પણ ટીમમાં સામેલ કરવામાં આવ્યા છે જેમનો T20 ક્રિકેટમાં ભારત સામેનો રેકોર્ડ ઘણો સારો છે અને આ ખેલાડીઓ ગમે ત્યારે મેચનો માર્ગ બદલી શકે છે. જાણો કોણ છે આ ત્રણ ખેલાડીઓ..
દુષ્મંથા ચમીરા
ફાસ્ટ બોલર દુષ્મંથા ચમીરાને પણ T20 સિરીઝ માટે ટીમમાં સામેલ કરવામાં આવ્યો છે. T20 ક્રિકેટમાં ટીમ ઈન્ડિયા સામે દુષ્મંથા ચમીરાના આંકડા ઘણા પ્રભાવશાળી છે. ભારતીય ટીમ સામે બોલિંગ કરતી વખતે દુષ્મંથા ચમીરાએ 15 મેચમાં 16 વિકેટ ઝડપી છે. દુષ્મંથા ચમીરા ભારત સામેની T20 આંતરરાષ્ટ્રીય મેચોમાં શ્રીલંકા માટે સૌથી વધુ વિકેટ લેનાર બોલર પણ છે. આવી સ્થિતિમાં ટીમ ઈન્ડિયાના બેટ્સમેનોએ થોડી સાવધાની સાથે ચમીરાનો સામનો કરવો પડશે.
દાસુન શનાકા
દાસુન શનાકાને પણ T20 ટીમમાં તક મળી છે. ભારત સામે શનાકાના આંકડા પણ જબરદસ્ત છે. તેણે ભારત સામે અત્યાર સુધીમાં 22 T20 મેચ રમી છે. જેની 12 ઇનિંગ્સમાં શનાકાએ 14 વિકેટ લીધી છે. શનાકા ટીમ ઈન્ડિયા સામે T20 ક્રિકેટમાં શ્રીલંકા તરફથી સૌથી વધુ વિકેટ લેનાર બીજા બોલર છે.
વાનિન્દુ હસરંગા
શ્રીલંકા T20 ટીમના પૂર્વ કેપ્ટન વાનિન્દુ હસરાંગાને પણ ભારત સાથેની T20 સિરીઝ માટે શ્રીલંકાની ટીમમાં સામેલ કરવામાં આવ્યો છે. હસરંગા ટીમ ઈન્ડિયા સામે અત્યાર સુધીમાં 10 T20 મેચ રમી ચૂક્યો છે, જેમાં તેના નામે 10 વિકેટ છે. આ સમયગાળા દરમિયાન હસરંગાનું સર્વશ્રેષ્ઠ બોલિંગ પ્રદર્શન 9 રનમાં 4 વિકેટ હતું. આવી સ્થિતિમાં હસરંગા ટીમ ઈન્ડિયા માટે મોટો ખતરો સાબિત થઈ શકે છે.
T20 સિરીઝ માટે શ્રીલંકાની ટીમ
ચરિથ અસલંકા (c), પથુમ નિસાન્કા, કુસલ પરેરા, અવિષ્કા ફર્નાન્ડો, કુસલ મેન્ડિસ, દિનેશ ચંદીમલ, કામિન્દુ મેન્ડિસ, દાસુન શનાકા, વાનિન્દુ હસરંગા, મહેશ તિક્ષાના, ચામિંદુ વિક્રમાસિંઘે, મથિશા પથિરાના, નુવાન થુષારા, દુનિથ વેલાગે, દુષ્મંથા ચમીરા, બિનુરા ફર્નાન્ડો
