- ઝિમ્બાબ્વે સામે ટીમ ઈન્ડિયાની શરમજનક હાર
- ભારતના 2 ખેલાડી ખાતુ ખોલાવી શક્યા ન હતા
- બોલિંગમાં બિશ્નોઈ અને સુંદરનું શાનદાર પ્રદર્શન
ભારત અને ઝિમ્બાબ્વે વચ્ચે શનિવારે હરારેમાં રમાયેલી પ્રથમ T20 ઈન્ટરનેશનલ મેચમાં ટીમ ઈન્ડિયાને શરમજનક હારનો સામનો કરવો પડ્યો હતો. IPLના સ્ટાર ખેલાડીઓથી શણગારેલી ટીમ ઈન્ડિયા આ મેચમાં 116 રન પણ બનાવી શકી ન હતી અને 13 રનથી હારી ગઈ હતી. કોઈએ વિચાર્યું ન હતું કે ઝિમ્બાબ્વેની ટીમ 115 રનનો બચાવ કરતી વખતે 'વર્લ્ડ ચેમ્પિયન' ટીમ ઈન્ડિયાને હરાવી દેશે. આ મેચમાં ટીમ ઈન્ડિયા 19.5 ઓવરમાં માત્ર 102 રનમાં જ ઓલઆઉટ થઈ ગઈ હતી.
અભિષેક શર્મા
ટીમ ઈન્ડિયાને IPLના સ્ટાર બેટ્સમેન અભિષેક શર્મા પાસેથી ઘણી અપેક્ષાઓ હતી. પરંતુ તે ખાતું ખોલાવ્યા વિના જ આઉટ થઈ ગયો. તે ઝિમ્બાબ્વેના બોલર બ્રાયન બેનેટ સામે લાચાર દેખાતો હતો. અભિષેક માત્ર 4 બોલ જ રમી શક્યો હતો. અભિષેકે ડેબ્યૂમાં જ ચાહકોને નિરાશ કર્યા હતા. તે બીજા છેડે કેપ્ટન શુભમન ગિલને સાથ આપી શક્યો ન હતો અને ટીમ ઈન્ડિયાને આંચકો આપતા પેવેલિયનમાં ગયો હતો. તેને બ્રાયન બેનેટના હાથે કેચ કરાવ્યો અને વેલિંગ્ટન મસાકાડજાએ પેવેલિયનનો રસ્તો બતાવ્યો.
રૂતુરાજ ગાયકવાડ
અભિષેક શર્માના આઉટ થયા બાદ ભારતીય ટીમને અનુભવી બેટ્સમેન રૂતુરાજ ગાયકવાડ પાસેથી ઘણી અપેક્ષાઓ હતી, પરંતુ તે પણ ઝિમ્બાબ્વેના બોલરોની સામે બેક ફૂટ પર જોવા મળ્યો હતો. રૂતુરાજે 9 બોલમાં માત્ર 1 ફોર ફટકારીને 7 રન બનાવ્યા હતા. તેને ચોથી ઓવરમાં બ્લેસિંગ મુઝરાબાનીએ પેવેલિયન મોકલ્યો હતો.
રિયાન પરાગ
IPLમાં તબાહી મચાવનાર રિયાન પરાગ પાસેથી એવી અપેક્ષા રાખવામાં આવી હતી કે તે નિર્ભયતાથી બેટિંગ કરશે અને ઝિમ્બાબ્વેને બેકફૂટ પર લાવી દેશે, પરંતુ તેમ થઈ શક્યું નહીં. પરાગ 3 બોલમાં માત્ર 2 રન બનાવી શક્યો હતો. તે પાંચમી ઓવરના ચોથા બોલ પર તેન્ડાઈ ચતારાએ આઉટ થયો હતો.
રિંકુ સિંહ
એક પછી એક વિકેટો ગુમાવ્યા બાદ ફિનિશર તરીકે ઓળખાતા રિંકુ સિંહ પાસેથી એવી અપેક્ષા રાખવામાં આવી હતી કે તે ધીરે ધીરે પરંતુ ચોક્કસ ભારતીય ટીમને વિજયની ઉંબરે લઈ જશે, પરંતુ તેમ થઈ શક્યું નહીં. રિંકુ ઝિમ્બાબ્વે સામે પોતાના પ્રદર્શનથી નિરાશ થયો હતો. તે પાંચમી ઓવરના છઠ્ઠા બોલ પર ખરાબ શોટ રમીને આઉટ થયો હતો. રિંકુ ટેન્ડાઈ ચતારાએ બ્રાયન બેનેટના હાથે કેચ આઉટ થયો હતો. રિંકુ સિંહ ખાતું પણ ખોલાવી શક્યો નહોતો.
ધ્રુવ જુરેલ
IPLમાં શાનદાર પ્રદર્શન માટે પ્રશંસા મેળવનાર ધ્રુવ જુરેલ બેટિંગમાં નબળો દેખાતો હતો. તેણે એવી રીતે બેટિંગ શરૂ કરી કે જાણે તે ટેસ્ટ રમી રહ્યો હોય. જુરેલે 14 બોલમાં માત્ર 6 રન બનાવ્યા હતા. તેને 10મી ઓવરમાં લ્યુક જોંગવેએ આઉટ કર્યો હતો. તેને વેસ્લી માધવેરેએ કેચ આઉટ કરાવ્યો હતો. આ તમામ ખેલાડીઓ ટીમ ઈન્ડિયાની અપેક્ષાઓ પર ખરા ઉતર્યા ન હતા. જો કે વોશિંગ્ટન સુંદરે અંત સુધી લીડ જાળવી રાખી હતી, પરંતુ તે ભારતને જીત તરફ દોરી ન શક્યો. સુંદર 34 બોલમાં 27 રન બનાવીને આઉટ થયો હતો. તેણે એક ફોર અને એક સિક્સર ફટકારી હતી.
બોલિંગમાં બિશ્નોઈ અને સુંદરનું શાનદાર પ્રદર્શન
ટીમ ઈન્ડિયા તરફથી બોલિંગમાં રવિ બિશ્નોઈ, વોશિંગ્ટન સુંદર અને મુકેશ કુમારે શાનદાર પ્રદર્શન કર્યું હતું. રવિ બિશ્નોઈએ 4 ઓવરમાં 13 રન આપીને 4 વિકેટ લીધી હતી. તેણે 2 મેડન ઓવર નાખી. જ્યારે વોશિંગ્ટન સુંદરે 4 ઓવરમાં 11 રન આપીને 2 વિકેટ ઝડપી હતી. મુકેશ કુમાર અને અવેશ ખાને એક-એક વિકેટ લીધી હતી. ખલીલ અહેમદ અને અભિષેક શર્મા ખાલી હાથ રહ્યા હતા.
