- વર્લ્ડ કપની પાંચમી મેચમાં ભારતે ઓસ્ટ્રેલિયાને હરાવ્યું
- ઓસ્ટ્રેલિયાના ખેલાડી મિચલ માર્શે કોહલીનો કેચ છોડ્યો
- કોહલીએ 116 બોલનો સામનો કરીને 85 રન કર્યા
ચેન્નાઈમાં વર્લ્ડ કપ 2023ની પાંચમી મેચમાં ભારતે ઓસ્ટ્રેલિયાને 6 વિકેટે હરાવ્યું હતું. ટીમ ઈન્ડિયાની જીતમાં કેએલ રાહુલ અને વિરાટ કોહલીએ મહત્વની ભૂમિકા ભજવી હતી. કોહલીએ 85 રનની શાનદાર ઇનિંગ રમી હતી. જ્યારે રાહુલે અણનમ 97 રન બનાવ્યા હતા. ઓસ્ટ્રેલિયાના ખેલાડી મિચલ માર્શે કોહલીનો એક કેચ છોડ્યો હતો. આ મેચનો સૌથી મોટો ટર્નિંગ પોઈન્ટ હતો. ઓસ્ટ્રેલિયાની હારમાં આ કેચ મહત્વનો હતો.
માર્શે કોહલીનો કેચ છોડ્યો
વાસ્તવમાં ઓસ્ટ્રેલિયાએ ભારતને જીતવા માટે 200 રનનો ટાર્ગેટ આપ્યો હતો. જેના જવાબમાં ટીમ ઈન્ડિયાની શરૂઆત ખૂબ જ ખરાબ રહી હતી. ભારતે માત્ર 2 રનના સ્કોર પર 3 વિકેટ ગુમાવી દીધી હતી. ઓપનર રોહિત શર્મા, ઈશાન કિશન અને શ્રેયસ અય્યર શૂન્ય પર આઉટ થયા હતા. આ પછી કોહલી અને રાહુલ બેટિંગ કરવા આવ્યા હતા. કોહલીએ 8મી ઓવરના ત્રીજા બોલ પર શોટ રમ્યો હતો. બોલ હવામાં ઉછળ્યો હતો. આ જોઈને મિડ-વિકેટ પર ઊભેલો માર્શ બોલ તરફ દોડ્યો અને તેને પકડવાનો પ્રયાસ કર્યો. પરંતુ તે નિષ્ફળ ગયો અને કેચ છૂટી ગયો હતો.
કોહલી અને રાહુલ વચ્ચે પાર્ટનરશીપ
કોહલીનો કેચ ન કરવો ઓસ્ટ્રેલિયા માટે મોંઘો સાબિત થયો હતો. કોહલીનો જ્યારે કેચ છૂટ્યો ત્યારે ટીમ ઈન્ડિયાનો સ્કોર 3 વિકેટના નુકસાન સાથે 20 રન હતો. જો કોહલી આઉટ થયો હોત તો ઓસ્ટ્રેલિયન ટીમ ભારત પર સંપૂર્ણપણે દબાણ બનાવી શકી હોત. કેચ છૂટી ગયા બાદ કોહલીએ રમતને આગળ વધારી અને કેએલ રાહુલ સાથે 165 રનની શાનદાર પાર્ટનરશીપ કરી હતી. કોહલીએ 116 બોલનો સામનો કરીને 85 રન કર્યા હતા. તેણે 6 ચોગ્ગા ફટકાર્યા હતા. જ્યારે રાહુલે અણનમ 97 રન કર્યા હતા. 115 બોલનો સામનો કરીને તેણે 8 ફોર અને 2 સિક્સર ફટકારી હતી. પ્રથમ બેટિંગ કરવા ઉતરેલી ઓસ્ટ્રેલિયન ટીમ 199 રનના સ્કોર પર સમેટાઈ ગઈ હતી. જવાબમાં ભારતે 4 વિકેટ ગુમાવીને 41.2 ઓવરમાં લક્ષ્યાંક હાંસલ કરી લીધો હતો.
વર્લ્ડ કપમાં કોહલીની સાતમી ફિફ્ટી
નંબર-3 પર રમવા આવેલા વિરાટ કોહલીએ વર્લ્ડ કપમાં પોતાની સાતમી ફિફ્ટી ફટકારી હતી. તેણે પોતાની ODI કારકિર્દીની 67મી અડધી સદી પૂરી કરી હતી. કોહલીએ 73.28ની સ્ટ્રાઈક રેટથી 116 બોલમાં 85 રન બનાવ્યા હતા. કોહલીની ઇનિંગમાં 6 ચોગ્ગા સામેલ હતા.
ભારતની જીત
પ્રથમ બેટિંગ કરવા ઉતરેલી ઓસ્ટ્રેલિયન ટીમ 199 રનના સ્કોર પર સમેટાઈ ગઈ હતી. જવાબમાં ભારતે 4 વિકેટ ગુમાવીને 41.2 ઓવરમાં લક્ષ્યાંક હાંસલ કરી લીધો હતો.
