મુંબઈ ટેસ્ટના બીજા દિવસની રમત પૂરી થઈ ગઈ છે. બીજા દિવસના અંતે ન્યુઝીલેન્ડનો સ્કોર 9 વિકેટે 171 રન છે. આ રીતે કીવી ટીમની લીડ વધીને 143 રન થઈ ગઈ છે. ન્યુઝીલેન્ડ તરફથી એજાઝ પટેલ અને વિલિયમ ઓરુકે નોટઆઉટ છે.
રવિન્દ્ર જાડેજાને મળી 4 સફળતા
રવિન્દ્ર જાડેજા ભારત માટે અત્યાર સુધીનો સૌથી સફળ બોલર રહ્યો છે. રવિન્દ્ર જાડેજાને 4 સફળતા મળી છે. આ સિવાય રવિ અશ્વિને 3 બેટ્સમેનોને પોતાનો શિકાર બનાવ્યા હતા. આકાશદીપ અને વોશિંગ્ટન સુંદરે 1-1 વિકેટ લીધી છે. આજે બીજા દિવસે બંને ટીમના 15 બેટ્સમેનો પેવેલિયન પરત ફર્યા હતા.
રિષભ પંત અને શુભમન ગિલની શાનદાર બેટિંગ
આ પહેલા ભારતે બીજા દિવસે 4 વિકેટે 84 રનથી રમવાનું શરૂ કર્યું હતું. ભારત માટે શુભમન ગિલ અને રિષભ પંતે 96 રનની ભાગીદારી કરી હતી, પરંતુ આ પછી ટીમ ઈન્ડિયાના બેટ્સમેનો જલદી પેવેલિયન પરત ફરતા રહ્યા હતા. જેના કારણે ભારતીય ટીમ 263 રનમાં ઓલઆઉટ થઈ ગઈ હતી.
રિષભ પંત 59 બોલમાં 60 રન બનાવ્યા
રિષભ પંત 59 બોલમાં 60 રન બનાવીને આઉટ થયો હતો. તેને પોતાની ઈનિંગમાં 8 ફોર અને 2 સિક્સર ફટકારી હતી. જ્યારે શુભમન ગિલે 146 બોલમાં 90 રન બનાવ્યા હતા. તેને પોતાની ઈનિંગમાં 7 ફોર અને 1 સિક્સર ફટકારી હતી. આ પછી ભારતીય બેટ્સમેનોની સતત પેવેલિયન પરત ફરવાની પ્રક્રિયા શરૂ થઈ હતી. સરફરાઝ ખાન એકપણ રન બનાવ્યા વિના આઉટ થયો. રવિન્દ્ર જાડેજાએ 14 રન બનાવ્યા હતા. જ્યારે રવિ અશ્વિને 6 રનનું યોગદાન આપ્યું હતું. આકાશદીપ શૂન્ય રને આઉટ થયો હતો. પરંતુ વોશિંગ્ટન સુંદરે 38 રનનું મહત્વનું યોગદાન આપ્યું હતું.
એજાઝ પટેલે 5 બેટ્સમેનોને કર્યા આઉટ
ન્યુઝીલેન્ડ તરફથી એજાઝ પટેલ સૌથી સફળ બોલર રહ્યો હતો. એજાઝ પટેલે 5 બેટ્સમેનોને આઉટ કર્યા હતા. આ સિવાય મેટ હેનરી, ગ્લેન ફિલિપ્સ અને ઈશ સોઢીએ 1-1 વિકેટ લીધી હતી.
