IND vs SL: સ્ટાર ખેલાડીની વાપસી પર લટકી તલવાર, ગંભીર થશે મહેરબાન?

• ઝિમ્બાબ્વે બાદ હવે ટીમ ઈન્ડિયા શ્રીલંકાના પ્રવાસે જશે
  
• ODI અને T20 બંને સિરીઝમાં બે અલગ-અલગ કેપ્ટન હશે
• કોચ ગૌતમ ગંભીરનો કાર્યકાળ પણ આ પ્રવાસ સાથે શરૂ થશે

ઝિમ્બાબ્વે બાદ હવે ટીમ ઈન્ડિયા શ્રીલંકાના પ્રવાસે જઈ રહી છે. ટીમ ઈન્ડિયા આ પ્રવાસમાં વનડે અને ટી20 સિરીઝ રમવાની છે. અહેવાલો અનુસાર ટીમ ઈન્ડિયાના ODI અને T20 બંને સિરીઝમાં બે અલગ-અલગ કેપ્ટન હશે. બીજી તરફ ટીમ ઈન્ડિયાના નવા મુખ્ય કોચ ગૌતમ ગંભીરનો કાર્યકાળ પણ આ પ્રવાસ સાથે શરૂ થવા જઈ રહ્યો છે.

ટીમ ઇન્ડિયાની ટૂંક સમયમાં થશે જાહેરાત

BCCI ટૂંક સમયમાં આ પ્રવાસને લઈને ટીમ ઈન્ડિયાની જાહેરાત કરી શકે છે, આવી સ્થિતિમાં સ્ટાર યુવા ખેલાડીની ટીમમાં વાપસી પર ફરીથી તલવાર લટકી રહી છે. જોકે, એવી અપેક્ષા છે કે નવા મુખ્ય કોચ ગૌતમ ગંભીર આ ખેલાડીની વાપસી પર વિચાર કરી શકે છે.

શું ઈશાન કિશનને ટીમમાં મળશે સ્થાન?

ટીમ ઈન્ડિયાનો વિકેટકીપર બેટ્સમેન ઈશાન કિશન ડિસેમ્બર 2023થી ટીમની બહાર છે. વાસ્તવમાં ઈશાન કિશને રણજી ટ્રોફી રમવાના BCCIના આદેશની અવગણના કરી હતી. જે બાદ કિશનને માત્ર ટીમમાંથી જ પડતો મુકવો પડ્યો ન હતો, પરંતુ તેનો સેન્ટ્રલ કોન્ટ્રાક્ટ પણ રદ કરવામાં આવ્યો હતો. જો કે, આ પછી કિશને ચોક્કસપણે IPL રમ્યો, જેમાં તેનું પ્રદર્શન શાનદાર રહ્યું. હવે કિશન ટીમમાં વાપસી કરવાનો રસ્તો શોધી રહ્યો છે. કિશનને ઝિમ્બાબ્વે સાથે રમાયેલી 5 મેચની T20 સિરીઝમાં પણ તક આપવામાં આવી ન હતી.

રિષભ પંત અને સંજુ સેમસને મુશ્કેલી વધારી

વિકેટકીપર બેટ્સમેન રિષભ પંત અને સંજુ સેમસનની હાજરીએ હવે ઈશાન કિશન માટે વાપસીનો માર્ગ વધુ મુશ્કેલ બનાવી દીધો છે. IPL 2024 અને T20 વર્લ્ડકપ 2024માં શાનદાર પ્રદર્શન કરનાર પંતને ટીમ ઈન્ડિયામાં નિશ્ચિત સ્થાન માનવામાં આવે છે.

બીજી તરફ સંજુ સેમસનનું હાલનું ફોર્મ પણ શાનદાર છે, IPLમાં શાનદાર પ્રદર્શન કર્યા બાદ સંજુને T20 વર્લ્ડકપ માટે ટીમમાં પસંદ કરવામાં આવ્યો હતો. જો કે તેને આ ટૂર્નામેન્ટમાં રમવાની તક મળી ન હતી, ત્યારબાદ ઝિમ્બાબ્વે પ્રવાસ માટે સંજુને પણ ટીમમાં સામેલ કરવામાં આવ્યો હતો, પરંતુ આ સિરીઝમાં સંજુનું પ્રદર્શન શાનદાર રહ્યું હતું. આવી સ્થિતિમાં ઈશાન કિશનની મુશ્કેલીઓ વધવા લાગી છે.