- કોલકાતા નાઈટ રાઈડર્સએ RCBને એક રનથી હરાવ્યું
- વિરાટ કોહલી અમ્પાયરના નિર્ણય પર થયો ગુસ્સે
- વિવાદાસ્પદ વિકેટ પર ડુ પ્લેસિસે આપ્યું નિવેદન
કોલકાતા નાઈટ રાઈડર્સ અને રોયલ ચેલેન્જર્સ બેંગ્લોર વચ્ચે કોલકાતાના ઈડન ગાર્ડન્સ ખાતે રમાયેલી મેચમાં ભારે અરાજકતા જોવા મળી હતી. વિરાટ કોહલીને થર્ડ અમ્પાયરે કેચ આઉટ જાહેર કર્યા બાદ કોહલી ખૂબ જ ગુસ્સામાં જોવા મળ્યો હતો. તેણે કમરથી ઉંચા બોલ માટે રિવ્યુ લીધો, પરંતુ અમ્પાયરે તેને યોગ્ય ડિલિવરી ગણી અને તેને આઉટ જાહેર કર્યો. કોહલી જ્યારે પેવેલિયન પરત ફર્યો ત્યારે ડુ પ્લેસિસ પણ અમ્પાયર સાથે ચર્ચા કરતો જોવા મળ્યો હતો. આ વિવાદાસ્પદ વિકેટ પર ડુ પ્લેસિસે મેચ બાદ મોટું નિવેદન આપ્યું હતું.
'નિયમ તો નિયમ હોય છે'
આરસીબીના કેપ્ટને કહ્યું- નિયમ તો નિયમ હોય છે. વિરાટ અને હું માનતા હતા કે બોલ કદાચ કમરથી ઉંચો હતો. ડુ પ્લેસિસે આગળ કહ્યું- આવા નિર્ણયથી વિપક્ષી ટીમ હંમેશા ખુશ રહે છે, બીજી ટીમ નિરાશ થાય છે. જ્યારે લક્ષ્યાંક 220 જેટલો મોટો હોય છે ત્યારે ત્યાં સુધી પહોંચવા માટે ઘણી મહેનત કરવી પડે છે. મારી દૃષ્ટિએ સુનીલ નારાયણની ઓવર ટર્નિંગ પોઈન્ટ હતી. નારાયણ એક ઉત્તમ બોલર છે. ડુ પ્લેસિસે આગળ કહ્યું- અમે નિરાશ છીએ, પરંતુ મને ખેલાડીઓ પર ગર્વ છે. અમારા ખેલાડીઓ અંત સુધી જીત માટે લડ્યા હતા.
મેચ રોમાંચક મોડ પર સમાપ્ત
RCB અને KKR વચ્ચેની આ મેચ રોમાંચક મોડ પર સમાપ્ત થઈ. છેલ્લી ઓવરના એક તબક્કે, એવું લાગતું હતું કે આરસીબી મેચ જીતી જશે કારણ કે કર્ણ શર્માએ પ્રથમ ચાર બોલમાં ત્રણ છગ્ગા ફટકાર્યા હતા, પરંતુ મિચેલ સ્ટાર્કે તેને પાંચમા બોલ પર કેચ આઉટ કર્યો હતો. આ પછી લોકી ફર્ગ્યુસન છેલ્લા બોલ પર માત્ર એક રન બનાવી શક્યો અને રનઆઉટ થયો. આ રીતે KKRએ મેચ એક રનથી જીતી લીધી હતી. આ હાર બાદ RCB માટે પ્લેઓફમાં પહોંચવું ઘણું મુશ્કેલ બની ગયું છે. ટીમ 8માંથી 7 મેચ હારી ચૂકી છે અને પોઈન્ટ ટેબલમાં તળિયે છે.
