કોહલીનું જોવા મળ્યું રૌદ્ર રૂપ, આઉટ થયા બાદ અમ્પાયરો સાથે ભીડી બાથ

• કોલકાતા નાઈટ રાઈડર્સ અને RCB વચ્ચે મેચ
  
• કોલકાતાએ પ્રથમ બેટિંગ કરતા 222 રન બનાવ્યા
• વિરાટ કોહલી આ મેચમાં 18 રન બનાવીને આઉટ

IPL 2024ની 36મી મેચમાં કોલકાતા નાઈટ રાઈડર્સનો સામનો રોયલ ચેલેન્જર્સ બેંગ્લોર સામે થઈ રહ્યો છે. કોલકાતાના ઈડન ગાર્ડનમાં રમાઈ રહેલી આ મેચમાં આરસીબીએ ટોસ જીતીને પ્રથમ ફિલ્ડીંગ કરવાનું પસંદ કર્યું હતું. પ્રથમ બેટિંગ કરતા કોલકાતાએ 223 રન બનાવ્યા હતા. 223 રનના ટાર્ગેટનો પીછો કરી રહેલી RCB માટે આવતાની સાથે જ વિરાટ કોહલીએ આક્રમક બેટિંગ શરૂ કરી હતી. જોકે, ત્રીજી ઓવરમાં ફુલ ટોસ બોલ પર વિરાટ કેચ આઉટ થયો હતો. કોહલીના આઉટ થવાને લઈને સોશિયલ મીડિયા પર ચર્ચા ચાલી રહી છે. કોહલી પોતે પણ આઉટ થવાથી નાખુશ દેખાતો હતો.

ક્રિઝની બહાર હતો કોહલી

કોહલીએ ક્રિઝની બહાર આવીને રાણાના ઉંચા ફુલ ટોસ બોલને ફટકારવાનો પ્રયાસ કર્યો હતો. ઓન ફિલ્ડ અમ્પાયરે કોહલીને આઉટ આપ્યો હતો. આવી સ્થિતિમાં તેણે રિવ્યુ લીધો. ત્રીજા અમ્પાયરનું માનવું હતું કે વિરાટ ક્રિઝની બહાર છે, તેથી તે નો બોલને બદલે યોગ્ય ડિલિવરી હતી. થર્ડ અમ્પાયરના નિર્ણય બાદ વિરાટ કોહલી ગુસ્સે થયો હતો. આ દરમિયાન તે મેદાન પરના અમ્પાયર સાથે દલીલ કરતો પણ જોવા મળ્યો હતો. આ માટે તેમને સજા પણ થઈ શકે છે.

કોહલીએ 18 રન બનાવ્યા

કોહલીના પ્રદર્શનની વાત કરીએ તો તેણે 7 બોલમાં 18 રન બનાવ્યા હતા. આ દરમિયાન તેણે 1 ફોર અને 2 સિક્સર ફટકારી હતી. ગ્રીન જર્સીમાં વિરાટ કોહલીનું પ્રદર્શન કંઈ ખાસ રહ્યું નથી. છેલ્લી બે સિઝનમાં વિરાટ કોહલી ગ્રીન જર્સીમાં પોતાનું ખાતું પણ ખોલી શક્યો નહોતો. IPL 2024માં વિરાટ કોહલીના પ્રદર્શનની વાત કરીએ તો, તેણે 8 મેચમાં લગભગ 75ની એવરેજથી 372 રન બનાવ્યા છે. તે 17મી સિઝનમાં અત્યાર સુધીમાં સૌથી વધુ રન બનાવનાર બેટ્સમેન છે.