- CSKના બેટસમેન શિવમ દુબેએ GT સામેની મેચમાં શાનદાર બેટિંગ કરી
- 23 બોલમાં 51 રનની શાનદાર ઇનિંગ રમી હતી
- ધોની દુબેને 50 રન પૂરા કરવા પર પ્રતિક્રિયા આપતા જોવા મળ્યા
ચેન્નાઈ સુપર કિંગ્સે સતત બે મેચ જીતીને IPL 2024ની શાનદાર શરૂઆત કરી. ગુજરાત ટાઇટન્સ સામેની ટીમની બીજી મેચમાં ચેન્નાઈએ 63 રનથી મોટી જીત નોંધાવી અને પોઈન્ટ ટેબલમાં પ્રથમ સ્થાન પર કબજો જમાવ્યો. આ મેચમાં ઘાતક બેટસમેન શિવમ દુબેએ શાનદાર પ્રદર્શન કરીને ગુજરાતના બોલરોને માત આપી હતી. તેણે 23 બોલનો સામનો કરીને 51 રનની ઝડપી ઈનિંગ રમીને ટીમના સ્કોરને 200ની પાર લઈ જવામાં મહત્વની ભૂમિકા ભજવી હતી. આ ઇનિંગમાં તેણે ચોગ્ગા કરતાં વધુ છગ્ગા ફટકાર્યા હતા.
સિકસર પર સિકસર
ચોથા નંબર પર બેટિંગ કરવા આવેલા શિવમ દુબેએ 22 બોલમાં અડધી સદી ફટકારી હતી. આ સિઝનની આ મેચ સુધીની આ બીજી સૌથી ઝડપી અડધી સદી પણ હતી. તેણે પોતાની અડધી સદી પૂરી કરવા માટે 5 સિક્સર ફટકારી હતી. હવે ધોનીનું એક રિએક્શન વાયરલ થઈ રહ્યું છે, જેમાં તે ડગઆઉટમાં ઊભો છે અને દુબેએ ફિફ્ટી પૂરી કર્યા પછી તાળીઓ પાડતો જોવા મળે છે. ધોની ઉપરાંત પેવેલિયનમાં બેઠેલા સાથી ખેલાડીઓએ પણ શિવમ દુબેની શાનદાર ઇનિંગને બિરદાવી હતી.
CSK એ મેચ 63 રને જીતી હતી
આ મેચ જીતીને ચેન્નાઈ સુપર કિંગ્સે ટૂર્નામેન્ટમાં સતત બીજી મેચ જીતી લીધી છે. CSKએ ગુજરાત ટાઇટન્સને 63 રનના વિશાળ માર્જિનથી હરાવ્યું છે. મેચની વાત કરીએ તો ટોસ હારીને પ્રથમ બેટિંગ કરતા ચેન્નાઈના બેટ્સમેને નિર્ધારિત 20 ઓવરમાં 206 રન બનાવ્યા હતા. ઋતુરાજ ગાયકવાડ અને રચિન રવિન્દ્રએ 46-46 રન બનાવ્યા હતા. જ્યારે ચોથા નંબર પર બેટિંગ કરી રહેલા શિવમ દુબેએ 23 બોલમાં 2 ચોગ્ગા અને 5 છગ્ગાની મદદથી શાનદાર ઇનિંગ રમી હતી. પ્રથમ વખત IPL રમી રહેલા સમીર રિઝવીએ પણ રાશિદ ખાનની ઓવરમાં બે સિક્સર ફટકારીને 6 બોલમાં 14 રન બનાવ્યા હતા. ડેરીલ મિશેલ 24 રન બનાવીને અણનમ રહ્યો હતો. લક્ષ્યનો પીછો કરતી વખતે ગુજરાતના બેટ્સમેનો માત્ર 143 રન સુધી જ પહોંચી શક્યા હતા.
