IND Vs IRE: ટીમ ઈન્ડિયાની જાહેરાત, IPLમાં ધૂમ મચાવનારાને મળ્યું સ્થાન

• આયરલેન્ડ પ્રવાસ માટે ટીમ ઈન્ડિયાની જાહેરાત
  
• મોટા ખેલાડીઓને અપાયો આરામ
• રિંકુ સિંહ અને જીતેશ શર્માને ટીમમાં મળ્યું સ્થાન

આયરલેન્ડ વિરુદ્ધ આવતા મહિને રમાનારી ત્રણ મેચની T-20 સીરિઝ માટે ટીમ ઈન્ડિયાની જાહેરાત થઈ છે. ટીમમાં જસપ્રીત બુમરાહની વાપસી થઈ છે. સાથે જ આ પ્રવાસ દરમિયાન જસપ્રીત બુમરાહને ટીમ ઈન્ડિયાનો કેપ્ટન બનાવાયો છે. BCCIએ આયરલેન્ડ પ્રવાસ માટે યુવા ખેલાડીઓને મોકલવાનો નિર્ણય લીધો છે. ઋતુરાજ ગાયકવાડને આયરલેન્ડ પ્રવાસ દરમિયાન ટીમનો ઉપ-કેપ્ટન બનાવાયો છે.

રિંકુ સિંહને ટીમ ઈન્ડિયામાં સ્થાન મળ્યું

IPLમાં શાનદાર પ્રદર્શન કરનાર રિંકુ સિંહને આખરે ટીમ ઈન્ડિયામાં તક મળી છે. જીતેશ શર્માને પણ આયરલેન્ડ સામેની T20 સીરિઝ માટે ટીમ ઈન્ડિયામાં જગ્યા મળી છે. બુમરાહ ઉપરાંત ઈજામાંથી બહાર આવી રહેલા પ્રખ્યાત ફાસ્ટ બોલર કૃષ્ણાની પણ ટીમમાં વાપસી થઈ છે. લાંબા સમય બાદ શિવમ દુબેને પણ ટીમ ઈન્ડિયામાં જગ્યા આપવામાં આવી છે.

મોટા ખેલાડીઓને અપાયો આરામ

આયરલેન્ડ વિરુદ્ધ 3 T-20 મેચની સીરિઝ 18 ઓગસ્ટથી શરૂ થશે. બીજી T-20 મેચ 20 ઓગસ્ટે રમવામાં આવશે અને ત્રીજી મેચ 23 ઓગસ્ટે રમવામાં આવશે. એશિયા કપને ધ્યામાં રાખી BCCIએ તમામ મોટા ખેલાડીઓને આયરલેન્ડ પ્રવાસ દરમિયાન આરામ આપવાનો નિર્ણય લીધો છે. રોહિત શર્મા, વિરાટ કોહલી, હાર્દિક પંડ્યા, જાડેજા, સૂર્યકુમાર યાદવ, શુભમન ગિલ, કુલદીપ યાદવ, યુજવેન્દ્ર ચહલ, મોહમ્મદ શમી અને સિરાઝને આ સીરિઝમાંથી આરામ આપવામાં આવ્યો છે.

રાહુલ પરત ન ફર્યો

આ સીરિઝમાં 2 ખેલાડીઓ પરત ફર્યા નથી. કેએલ રાહુલ અને શ્રેયસ અય્યર પરત ફર્યા નથી. આ બંને ખેલાડીઓ એશિયા કપ માટે ઉપલબ્ધ રહેશે કે કેમ તે અંગે BCCIએ પણ કોઈ પ્રકારનું નિવેદન આપ્યું નથી.

આયરલેન્ડ પ્રવાસ દરમિયાન ટીમ ઈન્ડિયા

જસપ્રીત બુમરાહ(કેપ્ટન), ઋતુરાજ ગાયકવાડ, યશસ્વી જયસ્વાલ, તિલક વર્મા, રિંકૂ સિંહ, સંજૂ સેમસન, જિતેશ શર્મા, શિવમ દુબે, વોશિંગ્ટન સુંદર, શાહબાઝ અહમદ, રવિ બિશ્નોઈ, પ્રસિદ્ધ કૃષ્ણા, અર્શદીપ સિંહ, મુકેશ કુમાર, આવેશ ખાન.