ટીમ ઈન્ડિયાને મોટો ઝટકો, બોર્ડર-ગાવસ્કર ટ્રોફી પહેલા સૌથી મહત્વપૂર્ણ બોલર થયો બહાર

ભારતીય ટીમ નવેમ્બરમાં ઓસ્ટ્રેલિયાના પ્રવાસે જઈ રહી છે. જ્યાં 5 મેચની ટેસ્ટ સિરીઝ રમવાની છે. ભારતીય ક્રિકેટ કંટ્રોલ બોર્ડે ટીમ ઈન્ડિયાની જાહેરાત કરી છે. ફાસ્ટ બોલર મયંક યાદવને પ્રવાસ માટે ભારતીય ટીમમાં સ્થાન મળ્યું ન હતું તેનું કારણ સામે આવ્યું છે.

સિરીઝ શરૂ થાય તે પહેલા જ મયંક યાદવ બોર્ડર ગાવસ્કર ટ્રોફીમાંથી બહાર થઈ ગયો છે. મીડિયા સાથે વાત કરતા બીસીસીઆઈના એક સૂત્રએ જણાવ્યું કે મયંક યાદવને ઈજા થઈ છે, જેના કારણે તે 3 મહિના સુધી ટીમ ઈન્ડિયાની બહાર છે.

મયંક યાદવ થયો ઈજાગ્રસ્ત

મયંક યાદવને પીઠમાં ઈજા થઈ છે, જેના કારણે તે લગભગ ત્રણ મહિનાથી ક્રિકેટ એક્શનથી દૂર છે. તાજેતરમાં જ તેને બાંગ્લાદેશ સામે રમાયેલી ત્રણ મેચની T20 સિરીઝ માટે ટીમ ઈન્ડિયામાં સામેલ કરવામાં આવ્યો હતો. તેણે ત્રણેય મેચમાં શાનદાર બોલિંગ કરી હતી. પરંતુ તે તેની બોલિંગ દરમિયાન એક વખત પણ 150 કિલોમીટર પ્રતિ કલાકથી વધુનો આંકડો પાર કરી શક્યો નથી, જ્યારે IPLમાં તેણે ઘણી વખત 150 કિલોમીટર પ્રતિ કલાકની ઝડપે બોલ ફેંક્યો હતો. ન્યૂઝીલેન્ડ સામેની ટેસ્ટ સિરીઝમાં તેને રિઝર્વ તરીકે સામેલ કરવામાં આવ્યો હતો. પરંતુ હવે મયંક ભારતીય ટીમ સાથે ઓસ્ટ્રેલિયા જઈ શકશે નહીં.

બીસીસીઆઈના અધિકારીએ કહી આ વાત

બીસીસીઆઈના એક અધિકારીએ પીટીઆઈને જણાવ્યું કે મયંકને પીઠમાં કોઈ સમસ્યા થઈ રહી હોય તેવું લાગી રહ્યું છે. તે સ્ટ્રેસ ફ્રેક્ચરનો કેસ પણ હોઈ શકે છે. એનસીએની અગાઉની સૂચના મુજબ તે રણજી ટ્રોફીના ચોથા કે પાંચમા રાઉન્ડમાંથી રમી શક્યો હોત. પરંતુ હવે આ શક્ય નથી. તે ફરીથી લાંબા સમય માટે બહાર છે.

IPL 2024 દરમિયાન થઈ હતી ઈજા

IPL 2024માં મયંક યાદવે શરૂઆતની મેચમાં LSG માટે શાનદાર પ્રદર્શન કર્યું હતું. પરંતુ તે સીઝનની મધ્યમાં ઈજાગ્રસ્ત થયો હતો, જેના કારણે તે આખી સીઝનમાં એલએસજી માટે યોગદાન આપી શક્યો ન હતો. IPL બાદ મયંક ઘણા મહિનાઓ સુધી એક્શનથી દૂર હતો.