- સોશિયલ મીડિયા પર થયો ટ્રોલ
- છઠ્ઠીવાર ચેમ્પિયન બન્યું ઓસ્ટ્રેલિયા
- વિરાટ કોહલી બન્યો ‘પ્લેયર ઓફ ધ ટૂર્નામેન્ટ’
ઓસ્ટ્રેલિયન ખેલાડી મિશેલ માર્શ તે સમયે એક મોટો વિવાદનો વિષય બન્યો જ્યારે તેણે આઈસીસી વર્લ્ડ કપમાં જીત બાદ ઉજવણી દરમિયાન વર્લ્ડ કપ ટ્રોફી પર પગ મૂક્યો. ઓસ્ટ્રેલિયાએ અમદાવાદના નરેન્દ્ર મોદી સ્ટેડિયમમાં યજમાન ભારતને હરાવીને રેકોર્ડ છઠ્ઠો વર્લ્ડ કપ ટાઇટલ જીત્યું હતું. વાયરલ તસવીરમાં માર્શ વર્લ્ડ કપ ટ્રોફી પર પગ મૂકતો જોવા મળ્યો હતો, માર્શે હવે આ વિવાદાસ્પદ તસવીર પર પોતાનું મૌન તોડ્યું છે.
ટ્રોફીનો અનાદર કરવાનો નહોતો ઇરાદો
મિશેલ માર્શે ભારપૂર્વક કહ્યું કે તેનો ઈરાદો ટ્રોફીનો અનાદર કરવાનો નહોતો, જેણે સમગ્ર ભારતમાં હંગામો મચાવ્યો હતો. માર્શે કહ્યું કે, 'તે તસવિરમાં દેખીતી રીતે કોઈ અનાદર નહોતો. મેં તેના પર વધુ વિચાર કર્યો નથી, મેં સોશિયલ મીડિયા પર ઘણું જોયું નથી, તેમ છતાં દરેક મને કહે છે કે તે સમાપ્ત થઈ ગયું છે, અને તેમાં હવે કંઈ નથી. માર્શે ટુર્નામેન્ટમાં કુલ 441 રન બનાવ્યા હતા, પરંતુ તે ટ્રેવિસ હેડ હતો જેણે ફાઇનલમાં તેની મેચ-વિનિંગ સદી સાથે હેડલાઇન્સ બનાવી હતી. જોકે, ભારતના સ્ટાર બેટ્સમેન વિરાટ કોહલીને 'પ્લેયર ઓફ ધ ટૂર્નામેન્ટ' તરીકે પસંદ કરવામાં આવ્યો હતો, જેણે વર્લ્ડ કપમાં સૌથી વધુ 765 રનનો નવો રેકોર્ડ બનાવ્યો હતો.
વાસ્તવમાં માર્શની આ તસવીર ઓસ્ટ્રેલિયાના વર્લ્ડ કપ ટ્રોફી જીત્યાના થોડા કલાકો બાદ શેર કરવામાં આવી હતી. ફોટો જોઈને લાગે છે કે તે હોટલના રૂમનો છે, જ્યાં ઓસ્ટ્રેલિયાની ટીમ જીત બાદ આરામથી બેસીને એકબીજા સાથે વાત કરી રહી હતી.
સોશિયલ મીડિયા પર માર્શની આકરી ટીકા થઈ
એક તરફ વર્લ્ડ કપમાં ભારતની હારથી સમગ્ર દેશના ક્રિકેટ પ્રેમીઓમાં નિરાશા છવાઈ ગઈ હતી તો બીજી તરફ એક તસવીર વાયરલ થઈ રહી છે જેમાં માર્શ પોતાનો ગોલ્ડ મેડલ બતાવતી વખતે ટ્રોફી પર પોતાના બંને પગ રાખી રહ્યો હતો. આ તસવીર વાયરલ થતાં જ લોકોએ ટ્રોફી પ્રત્યેના આવા અનાદરપૂર્ણ કૃત્ય બદલ તેની ટીકા કરવાનું શરૂ કરી દીધું હતું.
છઠ્ઠી વાર ચેમ્પિયન બન્યુ ઓસ્ટ્રેલિયા
ઓસ્ટ્રેલિયાએ ક્રિકેટ વર્લ્ડ કપ 2023ની ફાઇનલમાં ભારતને હરાવીને છઠ્ઠું ટાઇટલ જીત્યું હતું. આ મેચ 19 નવેમ્બરે અમદાવાદમાં યોજાઈ હતી, જ્યાં ઓસ્ટ્રેલિયાએ ટોસ જીતીને પ્રથમ ફિલ્ડિંગ કરવાનું પસંદ કર્યું હતું. વિરાટ કોહલી અને કેએલ રાહુલે અડધી સદીનું યોગદાન આપતા ભારતે 240 રન બનાવ્યા હતા. જોકે ઓસ્ટ્રેલિયાના ટ્રેવિસ હેડે શાનદાર ઇનિંગ રમી હતી અને 120 બોલમાં 137 રન બનાવીને પોતાની ટીમને જીત તરફ દોરી હતી. ઓસ્ટ્રેલિયાએ 42 બોલ બાકી રહેતાં છ વિકેટે આસાનીથી જીત મેળવી લીધી હતી.
