ન્યૂઝીલેન્ડના ઓલરાઉન્ડર જીમી નિશામે સેન્ટ્રલ કોન્ટ્રાક્ટને નકાર્યો

• અન્ય T20 લીગમાં રમવા કોન્ટ્રાક્ટ સ્વીકારવાનો ઇનકાર
  
• બાઉલ્ટ-ગ્રાન્ડહોમી પણ કોન્ટ્રાક્ટ નકારી ચૂક્યા છે
• બ્લેર ટિકરે પણ કોન્ટ્રાક્ટ પર હસ્તાક્ષર કરવાનો ઇનકાર કર્યો

આગામી મહિને રમાનારા T20 વર્લ્ડકપ પહેલાં ન્યૂઝીલેન્ડ ક્રિકેટને મોટો ફટકો પડયો છે. ટીમના શાનદાર ઓલરાઉન્ડર જિમી નિશામે સેન્ટ્રલ કોન્ટ્રાક્ટને નકારી નાખ્યો છે. તેની સાથે પેસ બોલર બ્લેર ટિકરે પણ સેન્ટ્રલ કોન્ટ્રાક્ટ ઉપર હસ્તાક્ષર કરવાનો ઇનકાર કરી દીધો છે. નિશામ અને ટિકર બન્ને સિનિયર ખેલાડી ટ્રેન્ટ બાઉલ્ટ અને કોલિન ડી ગ્રાન્ડહોમીની ખોટ પૂરી કરતા હતા. બાઉલ્ટે પરિવાર સાથે વધારે સમય ગાળવા માટે તથા વિશ્વભરની T20 લીગ રમવા ચાલુ વર્ષની શરૂઆતમાં કોન્ટ્રાક્ટને રદ કર્યો હતો. ગ્રાન્ડહોમીએ એડિલેડ સ્ટ્રાઇકર્સ દ્વારા બિગ બેશ લીગ ડ્રાફ્ટમાં સામેલ થયા બાદ તરત જ ઇન્ટરનેશનલ ક્રિકેટમાંથી નિવૃત્તિ લઈ લીધી હતી.

વિશ્વભરની લીગમાં રમવાનો નિર્ણય

ન્યૂઝીલેન્ડની પ્લેઇંગ ઇલેવનમાંથી બહાર થયા બાદ અન્ય T20 લીગમાં રમવાની પ્રતિબદ્ધતા પૂરી કરવા નિશામે સેન્ટ્રલ કોન્ટ્રાક્ટ સ્વીકારવાનો ઇનકાર કર્યો હતો. નિશામે જણાવ્યું હતું કે સેન્ટ્રલ કોન્ટ્રાક્ટના કરેલા અસ્વીકારને અલગ રીતે જોવામાં આવશે અને લોકો એવું પણ કહેશે કે મેં દેશના બદલે નાણાંને પ્રાધાન્ય આપ્યું છે. મેં જુલાઈમાં કોન્ટ્રાક્ટને સ્વીકારવાની યોજના ઘડી હતી પરંતુ યાદીમાંથી મારી બાદબાકી થયા બાદ મેં વિશ્વભરની લીગમાં રમવાનો નિર્ણય કર્યો હતો. આ કપરો નિર્ણય છે પરંતુ મારે પ્રતિબદ્ધતાનો આદર કરવાની જરૂર છે.