Neeraj Chopraની નજર વર્લ્ડ ચેમ્પિયનશિપમાં ગોલ્ડ જીતવા પર, જણાવ્યો પોતાનો પ્લાન

ભારતના સ્ટાર ભાલા ફેંકનાર નીરજ ચોપરા મંગળવારે ઓસ્ટ્રાવા (ચેક રિપબ્લિક) માં ગોલ્ડન સ્પાઈક એથ્લેટિક્સ સ્પર્ધામાં ભાગ લેશે. આ દરમિયાન તેને કહ્યું છે કે આ સિઝનમાં તેનું લક્ષ્ય વર્લ્ડ ચેમ્પિયનશિપમાં ગોલ્ડ મેડલ જીતવાનું છે.

વર્લ્ડ એથ્લેટિક્સ ચેમ્પિયનશિપ આ વર્ષે 13 થી 21 સપ્ટેમ્બર દરમિયાન જાપાનની રાજધાની ટોક્યોમાં યોજાશે. નીરજ ચોપરા નિયમિતપણે 90 મીટર ફેંકવા માટે પોતાના પર કોઈ દબાણ લાવવા માગતા નથી અને આ સિઝન માટે તેમનું લક્ષ્ય વર્લ્ડ ચેમ્પિયનશિપમાં ટોપનું સ્થાન હાંસલ કરવાનું છે.

નીરજ ચોપરાએ કહી આ વાત

નીરજે ગયા અઠવાડિયે જુલિયન વેબરને 88.16 મીટરના થ્રો સાથે હરાવીને પેરિસ ડાયમંડ લીગ જીતી હતી. તેને કહ્યું કે ચેક રિપબ્લિકના મહાન જાન ઝેલેઝનીના કોચ તરીકેના સમર્થન અને તેમની સખત મહેનતથી, તેઓ સારા પરિણામો પ્રાપ્ત કરવાનો વિશ્વાસ ધરાવે છે.

27 વર્ષના નીરજે દોહામાં સીઝન-ઓપનિંગ ડાયમંડ લીગ સ્પર્ધામાં પોતાના કરિયરમાં પહેલીવાર 90 મીટરનો આંકડો પાર કર્યો અને તે તેનાથી ખૂબ જ ખુશ છે.

તેને કહ્યું કે 'મારી ટેકનિકમાં થોડો વધુ સુધારો કર્યા પછી, મેં આ વર્ષે 90 મીટર ફેંકી દીધો છે, ચાલો જોઈએ... હું આગલી વખતે આ અંતર ક્યારે હાંસલ કરીશ, પણ હું તૈયાર છું. તાજેતરમાં જ અમે નિમ્બર્ક (ચેક રિપબ્લિક) માં સારી પ્રેક્ટિસ કરી હતી તેથી મને વિશ્વાસ છે કે હું ઓસ્ટ્રાવામાં મારું શ્રેષ્ઠ આપીશ.'

ગયા વર્ષે ઈજાને કારણે સ્પર્ધામાં ભાગ લઈ શક્યો ન હતો નીરજ ચોપરા

નીરજ ચોપરા મંગળવારે યોજાનારી સ્પર્ધાને લઈને ખૂબ જ ઉત્સાહિત છે. તેમને કહ્યું કે 'જ્યારે હું નાનો હતો, ત્યારે મેં અહીં સ્પર્ધા કરતા ઉસૈન બોલ્ટ જેવા ખેલાડીઓના ઘણા બધા વીડિયો અને તસવીરો જોયા હતા. હું ગયા વર્ષે અહીં આવ્યો હતો, પરંતુ ઈજાને કારણે સ્પર્ધામાં ભાગ લઈ શક્યો ન હતો.'