- ભારતની મહિલા તીરંદાજી ટીમે રેન્કિંગ રાઉન્ડમાં શાનદાર પ્રદર્શન કર્યું
- દીપિકા, અંકિતા અને ભજન કૌરે સામૂહિક રીતે ભારતને 1,983 પોઈન્ટ અપાવ્યા
- ભારતીય ટીમ ચોથા ક્રમે રહી અને ક્વાર્ટર ફાઇનલમાં જગ્યા બનાવી લીધી
ભારતની મહિલા તીરંદાજી ટીમે પેરિસ ઓલિમ્પિકના રેન્કિંગ રાઉન્ડમાં શાનદાર પ્રદર્શન કર્યું છે. દીપિકા કુમારી, અંકિતા ભગત અને ભજન કૌરે સામૂહિક રીતે ભારતને 1,983 પોઈન્ટ અપાવ્યા છે. આ સાથે ભારતીય ટીમ ચોથા ક્રમે રહી અને ક્વાર્ટર ફાઇનલમાં જગ્યા બનાવી લીધી છે. વ્યક્તિગત સ્કોર વિશે વાત કરીએ તો, ભારત માટે શ્રેષ્ઠ પ્રદર્શન અંકિતા ભગત દ્વારા કરવામાં આવ્યું હતું, જેણે 72 શોટ ફટકારીને કુલ 666 પોઈન્ટ મેળવ્યા હતા અને તે 11માં સ્થાને રહી હતી. બીજી તરફ દીપિકા કુમારી અને ભજન કૌર ટોપ-20માંથી બહાર રહી.
ભારતીય ખેલાડીઓનું વ્યક્તિગત પ્રદર્શન
ભારતીય ખેલાડીઓના વ્યક્તિગત પ્રદર્શન પર નજર કરીએ તો અંકિતા 11માં, ભજન કૌર 22માં અને દીપિકા કુમારી 23માં ક્રમે છે. અંકિતાએ બીજા હાફના છેલ્લા બે સેટમાં શાનદાર વાપસી કરી હતી, જેમાં તેણે 120માંથી 112 પોઈન્ટ મેળવ્યા હતા. છેલ્લી ક્ષણોમાં, ખાસ કરીને 18 વર્ષની ભજન કૌરનું ખૂબ જ ખરાબ પ્રદર્શન જોવા મળ્યું, જેણે કુલ 659 પોઈન્ટ્સ મેળવ્યા. દીપિકા તેનાથી એક પોઈન્ટ પાછળ હતી અને તેણે 658 પોઈન્ટ સાથે રેન્કિંગ રાઉન્ડ પૂરો કર્યો હતો.
ક્વાર્ટર ફાઇનલમાં ભારતની એન્ટ્રી
નિયમોની વાત કરીએ તો, ટીમ લિસ્ટમાં ટોપ-4માં સ્થાન મેળવનારી ટીમોને ટીમ ઈવેન્ટની ક્વાર્ટર ફાઇનલમાં સીધી એન્ટ્રી મળશે. ભારત 1983 પોઈન્ટ સાથે ચોથા સ્થાને હોવાથી તેણે ક્વાર્ટર ફાઈનલમાં સીધો પ્રવેશ મેળવ્યો છે. ભારત હવે ક્વાર્ટર ફાઇનલમાં ફ્રાન્સ વિ નેધરલેન્ડ મેચના વિજેતા સાથે ટકરાશે. જ્યારે ટીમ રેન્કિંગમાં 5માથી 12મા ક્રમે રહેલી ટીમોએ પહેલા રાઉન્ડ ઓફ 16માંથી પસાર થવું પડશે.
128 એથ્લેટ્સનો બ્રેકેટ તૈયાર
રેન્કિંગ રાઉન્ડનો ઉદ્દેશ્ય તીરંદાજીમાં 128 એથ્લેટ્સનો બ્રેકેટ બનાવવાનો હતો. હવે આ 128 એથ્લેટ પોતપોતાના રેન્કિંગના આધારે સિંગલ્સ ઈવેન્ટમાં વ્યક્તિગત રીતે એકબીજાનો સામનો કરશે. પ્રથમ એથ્લેટ્સે ફાઈનલમાં પહોંચવા માટે રાઉન્ડ ઓફ 64, પછી રાઉન્ડ ઓફ 32 અને પછી પ્રી-ક્વાર્ટર ફાઈનલ અને સેમી ફાઈનલમાંથી પસાર થવું પડશે.
