બીજી ટેસ્ટ પહેલા સ્ટાર ખેલાડી બન્યો પિતા, પોસ્ટ કરી આપી જાણકારી

આ દિવસોમાં ટીમ ઈન્ડિયા ન્યુઝીલેન્ડ સામે ત્રણ મેચની ટેસ્ટ સિરીઝ રમી રહી છે. સિરીઝની પ્રથમ મેચ બેંગલુરુમાં રમાઈ હતી. જેમાં ભારતીય ટીમને હારનો સામનો કરવો પડ્યો હતો. હાલમાં ભારતીય ટીમ સિરીઝમાં 1-0થી પાછળ છે. હવે બીજી ટેસ્ટ મેચ પુણેમાં રમાશે. આ ટેસ્ટ મેચ પહેલા ટીમ ઈન્ડિયાના સ્ટાર ખેલાડીને મોટા સમાચાર મળ્યા છે.

સરફરાઝ ખાન પિતા બન્યો

ન્યુઝીલેન્ડ સામે બેંગલુરુ ટેસ્ટમાં પોતાની પ્રથમ આંતરરાષ્ટ્રીય સદી ફટકારનાર બેટ્સમેન સરફરાઝ ખાન હવે પિતા બની ગયો છે. સરફરાઝ ખાને સદી ફટકાર્યાના બે દિવસ બાદ જ આ ખૂબ જ સારા સમાચાર મળ્યા. તેમની પત્નીએ તેમના પહેલા બાળકને જન્મ આપ્યો છે. સરફરાઝના પિતાએ સોશિયલ મીડિયા પર એક પોસ્ટ શેર કરીને ચાહકોને આ ખુશખબર આપી છે.

ન્યુઝીલેન્ડ સામે ફટકારી પ્રથમ સદી

સરફરાઝે તાજેતરમાં ભારત વિરુદ્ધ ન્યુઝીલેન્ડની 1લી ટેસ્ટમાં તેની પ્રથમ ટેસ્ટ સદી ફટકારી હતી. જમણા હાથના બેટ્સમેને 195 બોલમાં 18 ચોગ્ગા અને ત્રણ છગ્ગાની મદદથી 150 રનની શાનદાર ઇનિંગ રમી હતી. સરફરાઝે 6 ઓગસ્ટ, 2023ના રોજ કાશ્મીરના રોમાના ઝહૂર સાથે લગ્ન કર્યા હતા. BSCની વિદ્યાર્થિની રોમાના ઝહૂર સરફરાઝ ખાનને પારિવારિક કનેક્શન દ્વારા મળ્યા હતા અને જે મિત્રતા શરૂ થઈ હતી તે પ્રેમ કહાનીમાં ફેરવાઈ ગઈ હતી.

સરફરાઝ ખાનનું કરિયર

સરફરાઝ ખાને ભારત માટે અત્યાર સુધીમાં કુલ 4 ટેસ્ટ મેચ રમી છે. આ સમયગાળા દરમિયાન તેણે 50થી વધુની એવરેજથી 350 રન બનાવ્યા છે. બેંગલુરુ ટેસ્ટમાં સદી ફટકારીને તેણે બતાવ્યું છે કે તે ટીમ ઈન્ડિયામાં જગ્યા બનાવવા માટે કેમ બેતાબ હતો. સરફરાઝે હવે ટેસ્ટ ટીમમાં પોતાનું સ્થાન નિશ્ચિત કરી લીધું છે.