- T20 વર્લ્ડકપ 2024 પાકિસ્તાનનું ખરાબ પ્રદર્શન
- સુપર-8 રાઉન્ડ માટે ક્વોલિફાય કરી શકી ન હતી
- શાહીન આફ્રિદીએ કહ્યું કે અમે સારું ક્રિકેટ રમ્યા નથી
T20 વર્લ્ડકપ 2024 પાકિસ્તાન ક્રિકેટ ટીમ માટે ખૂબ જ ખરાબ રહ્યો. આ વખતે પાકિસ્તાની ટીમ વર્લ્ડકપમાં સુપર-8 રાઉન્ડ માટે ક્વોલિફાય કરી શકી ન હતી અને તેને ગ્રુપ સ્ટેજમાંથી જ બહાર થવું પડ્યું હતું. ભારત ઉપરાંત અમેરિકાની ટીમ તેમના ગ્રુપમાંથી ક્વોલિફાય થઈ હતી.
પાકિસ્તાને T20 વર્લ્ડકપ 2024માં તેની છેલ્લી મેચ રવિવારે આયર્લેન્ડ સામે રમી હતી. જ્યાં તેની ટીમનો 3 વિકેટે વિજય થયો હતો. જો કે આ મેચ જીત્યા બાદ પણ પાકિસ્તાની ટીમને કોઈ ફાયદો મળી શક્યો ન હતો કારણ કે તેની ટીમ પહેલાથી જ બહાર થઈ ગઈ હતી. આ મેચ બાદ પણ પાકિસ્તાની ખેલાડીઓના ચહેરા પર ખુશી દેખાતી ન હતી. મેચ પૂરી થતાં જ શાહીન આફ્રિદીએ ટીમના પ્રદર્શન વિશે પોતાનો અભિપ્રાય આપ્યો હતો.
શાહીન આફ્રિદીએ શું કહ્યું?
શાહીન શાહ આફ્રિદીએ કહ્યું કે અમે સારું ક્રિકેટ રમ્યા નથી જેની માંગ અમારો દેશ કરે છે. ચેમ્પિયન્સ ટ્રોફી આવી રહી હોવાથી કેટલાક ક્ષેત્ર એવા છે જેમાં આપણે ઝડપથી સુધારો કરવાની જરૂર છે. આપણે એક ટીમ તરીકે સુધારો કરીને આગળ વધવું પડશે. અમેરિકા પણ ફેન્સે પાકિસ્તાનની ટીમને ખૂબ સપોર્ટ કર્યો. આ અંગે આફ્રિદીએ કહ્યું કે ફેન્સ હંમેશા આવે છે અને અમને સપોર્ટ કરે છે, સપોર્ટ માટે તમામનો આભાર. તે મુશ્કેલ સમયમાં પણ અમને ટેકો આપે છે, એક ટીમ તરીકે અમને તે જ જોઈએ છે. હવે સ્પષ્ટ છે કે પાકિસ્તાનની ટીમમાં ઘણા મોટા ફેરફાર જોવા મળી શકે છે.
T20 વર્લ્ડકપ 2024માં ખરાબ પ્રદર્શન
T20 વર્લ્ડકપમાં પાકિસ્તાન ક્રિકેટ ટીમ સાથે આવું પહેલીવાર બન્યું છે જ્યારે તેમની ટીમ ગ્રુપ સ્ટેજથી આગળ વધી શકી નથી. પાકિસ્તાન ક્રિકેટ માટે આ સૌથી ખરાબ T20 વર્લ્ડકપ પૈકીનો એક હતો. સુપર ઓવરમાં અમેરિકાના હાથે ગ્રૂપ સ્ટેજ દરમિયાન પાકિસ્તાનને સૌથી પહેલા મોટા અપસેટનો સામનો કરવો પડ્યો હતો. આ પછી ભારતીય ટીમે તેમને 6 રનથી હરાવ્યું. આ પછી પાકિસ્તાનને આશા હતી કે તેઓ પોતાના નસીબના આધારે સુપર 8માં પહોંચી જશે, પરંતુ અમેરિકા અને આયર્લેન્ડ વચ્ચેની મેચ વરસાદને કારણે રદ્દ થઈ ગઈ અને વર્લ્ડકપમાં પાકિસ્તાનની ટીમની સફર ત્યાં જ સમાપ્ત થઈ ગઈ. તેણે આયર્લેન્ડ સામે માત્ર એક જ ઔપચારિક મેચ રમી હતી. આ મેચની કોઈપણ ટીમની સ્થિતિ પર કોઈ અસર થઈ ન હતી.
