બાબર આઝમને શુભમન ગિલનો સીધો પડકાર, પાકિસ્તાની કેપ્ટન ટેન્શનમાં

• શુભમન ગિલે બાબર આઝમના વર્લ્ડ રેકોર્ડની બરાબરી કરી
  
• દ્વિપક્ષીય શ્રેણીમાં સૌથી વધુ રનનો કોહલીનો રેકોર્ડ તોડ્યો
• માત્ર એક રન માટે બાબરનો રેકોર્ડ તોડતા રહી ગયો ગિલ

ટીમ ઈન્ડિયાનું નવું રન મશીન શુભમન ગિલ એક પછી એક રેકોર્ડ બનાવી રહ્યો છે. પ્રથમ ODIમાં બેવડી સદી ફટકારનાર સૌથી યુવા બેટ્સમેન બન્યા બાદ તેણે ત્રીજી મેચમાં પણ સદી ફટકારી હતી.

બાબરના વર્લ્ડ રેકોર્ડની બરાબરી કરી

ભારતના આશાસ્પદ ઓપનર શુભમન ગિલે ન્યૂઝીલેન્ડ સામેની ODI શ્રેણીમાં બેવડી સદી અને એક સદી ફટકારી હતી. આ સાથે તેણે વિરાટ કોહલી દ્વારા થોડા દિવસો પહેલા બનાવેલા રેકોર્ડને તોડી નાખ્યો હતો. શુભમન ગિલે શ્રેણીમાં 360 રન બનાવ્યા હતા, જ્યારે ત્રણ મેચની દ્વિપક્ષીય શ્રેણીમાં સૌથી વધુ રનનો ભારતીય રેકોર્ડ 283 રનનો હતો, જે વિરાટ કોહલીના નામે છે. આટલું જ નહીં, ગિલે પાકિસ્તાનના કેપ્ટન બાબર આઝમના વર્લ્ડ રેકોર્ડની પણ બરાબરી કરી.

કોહલીનો તોડ્યો રેકોર્ડ

વાસ્તવમાં, બાબર આઝમે 2016માં વેસ્ટ ઈન્ડિઝ વિરુદ્ધ સતત ત્રણ મેચમાં સદી ફટકારીને 360 રન બનાવ્યા હતા. જ્યારે વિરાટ કોહલીએ શ્રીલંકા સામે તાજેતરમાં સમાપ્ત થયેલી શ્રેણીમાં ત્રણ મેચ રમીને 283 રન બનાવ્યા હતા. કોહલીએ 2017માં ન્યુઝીલેન્ડ સામે પોતાના જ 263 રનના રેકોર્ડને તોડ્યો હતો. બીજી તરફ, શુભમન ગિલ ODI વર્લ્ડ કપ 2023માં રોહિત શર્માનો ઓપનિંગ પાર્ટનર બનવાની લગભગ પુષ્ટિ થઈ ગઈ છે.

ન્યૂઝીલેન્ડ સામે રેકોર્ડ ઓપનિંગ ભાગીદારી

રોહિત શર્મા સાથે ઓપનિંગ કરતા ગિલે ત્રીજી ODIમાં પ્રથમ વિકેટ માટે 212 રનની શાનદાર ભાગીદારી કરી હતી. ઈન્દોરના ઐતિહાસિક હોલકર સ્ટેડિયમમાં ન્યૂઝીલેન્ડ સામેની કોઈપણ ODIમાં ભારત માટે આ સૌથી મોટી ઓપનિંગ ભાગીદારી હતી. આ પહેલા વીરેન્દ્ર સેહવાગ અને ગૌતમ ગંભીરે 2009માં 201 રનની ભાગીદારી કરી હતી. રોહિતે આ મેચમાં પોતાની ODI કારકિર્દીની 30મી સદી ફટકારી હતી, તો ગિલે પણ પોતાની સદી પૂરી કરી હતી. આ યુવા ઓપનર શાનદાર ફોર્મમાં છે. છેલ્લી 4 મેચમાં તેણે બેવડી સદી સહિત 3 સદી ફટકારી છે.

ICC ODI રેન્કિંગમાં ટીમ ઇન્ડિયા નંબર-1

મેચની વાત કરીએ તો, ભારતીય ટીમે પોતાના અજેય અભિયાનને ચાલુ રાખતા ત્રણ મેચની ODI શ્રેણીની ત્રીજી મેચમાં ન્યૂઝીલેન્ડને 90 રને હરાવ્યું હતું. શ્રેણીમાં ક્લીન સ્વીપની સાથે ટીમ ઈન્ડિયા ICC ODI રેન્કિંગમાં પણ ટોપ પર પહોંચી ગઈ છે. ઈન્દોરના હોલકર સ્ટેડિયમમાં રમાયેલી મેચમાં પ્લેયર ઓફ ધ સિરીઝ શુભમન ગિલ અને કેપ્ટન રોહિત શર્માની શાનદાર ભાગીદારીની મદદથી ભારતે નવ વિકેટે 385 રનનો વિશાળ સ્કોર બનાવ્યો હતો. જવાબમાં ન્યૂઝીલેન્ડની ટીમ 41.2 ઓવરમાં 295 રનમાં ઓલઆઉટ થઈ ગઈ હતી. આ સાથે ભારતે આ મેદાન પર પોતાનો અજેય રહેવાનો રેકોર્ડ પણ જાળવી રાખ્યો હતો.