- T20 વર્લ્ડકપ 2024માં અફઘાનિસ્તાનની રોમાંચક મેચમાં જીત
- અફઘાનિસ્તાન અને સાઉથ આફ્રિકા વચ્ચે રમાશે પ્રથમ સેમિફાઇનલ
- અફઘાનિસ્તાન અને સાઉથ આફ્રિકાના હેડ ટુ હેડમાં કોનું પલડું ભારે
T20 વર્લ્ડકપ 2024માં અફઘાનિસ્તાને રોમાંચક મેચમાં બાંગ્લાદેશને હરાવીને સેમિફાઇનલમાં પ્રવેશ કરી લીધો છે. હવે ટુર્નામેન્ટની પ્રથમ સેમિફાઇનલ અફઘાનિસ્તાન અને સાઉથ આફ્રિકા વચ્ચે રમાશે. ટૂર્નામેન્ટની બીજી સેમિફાઇનલ મેચમાં ભારતનો સામનો ઇંગ્લેન્ડ સામે થશે. T20 વર્લ્ડકપમાં અફઘાનિસ્તાનની ટીમ પ્રથમ વખત સેમિફાઇનલમાં પહોંચી છે. જ્યારે સાઉથ આફ્રિકા આ પહેલા બે વખત સેમિફાઈનલમાં પહોંચી ચૂક્યું છે. જો કે બંને વખત તેને સેમિફાઈનલમાં હારનો સામનો કરવો પડ્યો હતો.
શું સાઉથ આફ્રિકા પ્રથમ વખત ફાઇનલમાં પહોંચશે?
સાઉથ આફ્રિકા હજુ સુધી T20 વર્લ્ડકપની ફાઈનલ મેચ રમ્યું નથી. સાઉથ આફ્રિકાએ 2009 અને 2014ના વર્લ્ડકપમાં સેમિફાઇનલમાં જગ્યા બનાવી હતી. 2009માં તેને પાકિસ્તાનના હાથે સેમીફાઈનલમાંથી બહાર થવું પડ્યું હતું. જ્યારે 2014ના વર્લ્ડકપમાં ભારતે સેમીફાઈનલમાં સાઉથ આફ્રિકાની સફર ખતમ કરી નાખી હતી.
આ વર્લ્ડકપમાં સાઉથ આફ્રિકાનું પ્રદર્શન
આ વર્લ્ડકપમાં સાઉથ આફ્રિકાની ટીમ અત્યાર સુધી અજેય રહી છે. ગ્રુપ સ્ટેજમાં સાઉથ આફ્રિકાએ શ્રીલંકાને 6 વિકેટે, નેધરલેન્ડને 4 વિકેટે, બાંગ્લાદેશને 4 રને અને નેપાળને 1 રનથી હરાવ્યું હતું. જ્યારે સુપર-8માં સાઉથ આફ્રિકાએ યુએસએને 18 રનથી, ઈંગ્લેન્ડને 7 રનથી અને વેસ્ટ ઈન્ડિઝને 3 વિકેટે હરાવ્યું હતું. સાઉથ આફ્રિકા કોઈપણ ભોગે સેમીફાઈનલ જીતીને પ્રથમ વખત T20 વર્લ્ડકપની ફાઈનલ મેચ રમવા માંગશે.
આ વર્લ્ડકપમાં અફઘાનિસ્તાનનું પ્રદર્શન
અફઘાનિસ્તાને પણ વર્તમાન વર્લ્ડકપમાં શાનદાર પ્રદર્શન કર્યું છે. અફઘાનિસ્તાને ગ્રુપ સ્ટેજમાં યુગાન્ડાને 125 રને, ન્યુઝીલેન્ડને 84 રનથી અને પપુઆ ન્યુ ગીનીને 7 વિકેટે હરાવ્યું હતું. જ્યારે ગ્રુપ સ્ટેજની છેલ્લી મેચમાં અફઘાનિસ્તાનને વેસ્ટ ઈન્ડિઝ સામે 104 રનથી હારનો સામનો કરવો પડ્યો હતો. સુપર-8માં ભારતે અફઘાનિસ્તાનને 47 રને હરાવ્યું હતું.
આ પછી અફઘાનિસ્તાને ઓસ્ટ્રેલિયાને 21 રને અને બાંગ્લાદેશને 8 રનથી હરાવીને કમબેક કર્યું હતું અને સેમિફાઇનલમાં પ્રવેશ કર્યો હતો. અફઘાનિસ્તાને આ ટૂર્નામેન્ટમાં ન્યૂઝીલેન્ડ, ઓસ્ટ્રેલિયા અને બાંગ્લાદેશને હરાવીને પોતાનો ઇરાદો વ્યક્ત કર્યો છે. અફઘાનિસ્તાન આ લય સાથે ફાઇનલમાં પ્રવેશવા માંગશે.
બંને ટીમોમાં કોનું પલડું ભારે?
T20 વર્લ્ડકપમાં અફઘાનિસ્તાન અને સાઉથ આફ્રિકા અત્યાર સુધીમાં બે વાર સામસામે આવી ચૂક્યા છે. સાઉથ આફ્રિકા બંને વખત જીત્યું છે. 2010ના વર્લ્ડકપમાં બંને ટીમો પ્રથમ વખત સામસામે આવી હતી. જેમાં સાઉથ આફ્રિકાનો 59 રને વિજય થયો હતો. આ પછી 2016ના વર્લ્ડકપમાં બંને ટીમો સામસામે આવી હતી. જેમાં સાઉથ આફ્રિકાનો 37 રને વિજય થયો હતો.
આ આંકડાઓમાં ભલે સાઉથ આફ્રિકા મજબૂત દેખાઈ રહ્યું હોય, પરંતુ તે સમયે અફઘાનિસ્તાનની ટીમ નબળી માનવામાં આવતી હતી. આજે અફઘાનિસ્તાન કોઈપણ ટીમને હરાવવા સક્ષમ છે. અફઘાનિસ્તાને આ વર્લ્ડકપમાં ન્યૂઝીલેન્ડ, ઓસ્ટ્રેલિયા અને બાંગ્લાદેશને હરાવીને તેનો પુરાવો આપ્યો છે. આવી સ્થિતિમાં સાઉથ આફ્રિકા અફઘાનિસ્તાનને કોઈપણ કિંમતે હળવાશથી લેવાનો પ્રયાસ કરશે નહીં.
