- T20 વર્લ્ડકપ 2024માં ટીમ ઈન્ડિયા બની ચેમ્પિયન
- BCCIએ વાનખેડે સ્ટેડિયમમાં ખેલાડીઓનું સન્માન કર્યું
- રોહિત શર્માએ વર્લ્ડકપની ટ્રોફી BCCI ઓફિસમાં મૂકી હતી
T20 વર્લ્ડકપ 2024ની ટ્રોફી જીતીને પરત ફરેલી ભારતીય ટીમનું નવી દિલ્હીથી મુંબઈમાં જોરદાર સ્વાગત કરવામાં આવ્યું હતું. ટીમ ઈન્ડિયાની વિજયયાત્રામાં ચાહકોની પણ ભારે ભીડ ઉમટી હતી. જ્યારે BCCIએ વાનખેડે સ્ટેડિયમમાં ખેલાડીઓનું સન્માન કર્યું હતું. આ દરમિયાન, BCCIએ એક વીડિયો શેર કર્યો છે, જેમાં કેપ્ટન રોહિત શર્મા T20 વર્લ્ડકપ 2024ની ચમકતી ટ્રોફીને કેબિનેટ પર રાખતો જોવા મળે છે.
ટ્રોફી ક્યાં રાખવામાં આવી
BCCI દ્વારા જાહેર કરવામાં આવેલા વીડિયોમાં કેપ્ટન રોહિત શર્મા T20 વર્લ્ડકપ 2024ની ટ્રોફી હાથમાં લઈ રહ્યો છે. BCCIના પ્રમુખ રોજર બિન્ની, સેક્રેટરીઅને ઉપાધ્યક્ષ રાજીવ શુક્લા પણ તેમની સાથે હાજર છે. તે બધા BCCI ઓફિસ પહોંચ્યા અને અહીં જ કેપ્ટન રોહિત શર્માએ વર્લ્ડકપની ટ્રોફી કેબિનેટ પર મૂકી હતી.
BCCI ઓફિસમાં શા માટે રાખવામાં આવી ટ્રોફી?
1983, 2007 અને 2011 વર્લ્ડ કપની ટ્રોફી પણ BCCI ઓફિસમાં જ રાખવામાં આવી છે. આ સિવાય ચેમ્પિયન્સ ટ્રોફી પણ BCCI ઓફિસમાં રાખવામાં આવી છે. દરેક ક્રિકેટ બોર્ડની જેમ, BCCI પણ ICC ટુર્નામેન્ટમાંથી જીતેલી ટ્રોફી તેની ઓફિસમાં રાખે છે.
કઈ ટ્રોફી મળશે?
ODI વર્લ્ડકપની જેમ T20 વર્લ્ડકપની વાસ્તવિક ટ્રોફી પણ વિજેતા ટીમને આપવામાં આવતી નથી. ICC વાસ્તવિક ટ્રોફી તેની ઓફિસમાં રાખે છે. ICC ઓફિસમાં દરેક ટીમની કેબિનેટ હાજર હોય છે. ICC વિજેતા ટીમની કેબિનેટમાં રેકોર્ડ માટે મૂળ ટ્રોફી રાખે છે. તે જ સમયે, વિજેતા ટીમને એવોર્ડ સમારોહમાં પ્રતિકૃતિ ટ્રોફી (સમાન દેખાતી ટ્રોફી) આપવામાં આવે છે. પ્રતિકૃતિ ટ્રોફી પણ કોઈ ખેલાડી કે કોચ પાસે રાખવામાં આવતી નથી. ક્રિકેટ બોર્ડ તેને પોતાની કેબિનેટમાં રાખે છે.
ખેલાડીઓને શું મળશે?
વર્લ્ડકપ વિજેતા ટીમના ખેલાડી, કોચ અથવા કેપ્ટનને વર્લ્ડકપ ટ્રોફીને બદલે તેનું સત્તાવાર પ્રમાણપત્ર અને મેડલ આપવામાં આવે છે. આ ઉપરાંત વિજેતા ટીમને મળેલા પૈસા પણ ખેલાડીઓમાં સમાનરૂપે વહેંચવામાં આવે છે.
