- પાકિસ્તાન T20 વર્લ્ડકપ 2024ના ગ્રુપ સ્ટેજમાંથી બહાર
- પાકિસ્તાન ક્રિકેટ બોર્ડ ઘણા મોટા નિર્ણયો લઈ શકે છે
- સિનિયર ખેલાડીઓના સેન્ટ્રલ કોન્ટ્રાક્ટ રદ્દ કરી શકે છે
પાકિસ્તાનની ટીમ T20 વર્લ્ડકપ 2024ના ગ્રુપ સ્ટેજમાંથી બહાર થઈ ગઈ છે. પાકિસ્તાનની નજર અમેરિકા અને આયર્લેન્ડ વચ્ચે 14 જૂને ફ્લોરિડાના મેદાન પર રમનારી મેચ પર હતી. પરંતુ વરસાદના કારણે તે રદ્દ થઈ ગઈ હતી, જેના કારણે અમેરિકી ટીમે આગલા રાઉન્ડમાં જગ્યા બનાવી લીધી હતી. હવે, ટીમના ખરાબ પ્રદર્શનને ધ્યાનમાં રાખીને, પાકિસ્તાન ક્રિકેટ બોર્ડ ઘણા મોટા નિર્ણયો લઈ શકે છે
સેન્ટ્રલ કોન્ટ્રાક્ટ રદ્દ થવાની સંભાવના
PCB હવે ટીમના પ્રદર્શનની સમીક્ષા કરવા અને મોટા ફેરફારો કરવા માટે તૈયાર છે અને આગામી દિવસોમાં મોટા નિર્ણયો લેવાની અપેક્ષા છે. પીસીબીના અધ્યક્ષ મોહસિન નકવીએ કહ્યું છે કે ટીમમાં મોટી સર્જરી જરૂરી છે, જેના કારણે કેપ્ટન બાબર આઝમ અને અન્ય વરિષ્ઠ ખેલાડીઓ સહિતના ખેલાડીઓના સેન્ટ્રલ કોન્ટ્રાક્ટ રદ્દ થવાની સંભાવના છે.
પાકિસ્તાનનું વર્લ્ડકપમાં પ્રદર્શન
પાકિસ્તાને વર્લ્ડકપમાં અત્યાર સુધી 3 મેચ રમી છે. જેમાં ટીમને 2 હાર અને એકમાં જીત મળી હતી. જ્યારે પાકિસ્તાનની ટીમને યુએસએ અને આયર્લેન્ડ વચ્ચેની મેચથી ઘણી અપેક્ષાઓ હતી. જો યુએસએની ટીમ આ મેચમાં હારી ગઈ હોત તો પાકિસ્તાન સુપર-8 માટે ક્વોલિફાય થઈ શક્યું હોત. પરંતુ મેચ રદ્દ થવાના કારણે પાકિસ્તાનની ટીમ બહાર થઈ ગઈ હતી.
