- યુવરાજ સિંહની કપ્તાનીમાં ભારત WCLમાં બન્યું ચેમ્પિયન
- ફાઇનલમાં પાકિસ્તાનને હરાવીને ટાઇટલ જીત્યું હતું
- યુવરાજ સિંહે તેની ઓલ ટાઈમ બેસ્ટ ઈલેવન પસંદ કરી
યુવરાજ સિંહની કપ્તાનીમાં ભારત ચેમ્પિયન્સે વર્લ્ડ ચેમ્પિયનશિપ ઓફ લિજેન્ડ્સ 2024ની ફાઇનલમાં પાકિસ્તાનને હરાવીને ટાઇટલ જીત્યું હતું. ભારત અને પાકિસ્તાનની ટીમો વચ્ચે રમાયેલી ફાઈનલ મેચમાં એવા ઘણા દિગ્ગજો હતા, જેઓ 2007 T20 વર્લ્ડકપની ફાઇનલમાં પણ સામેલ હતા. આ ટુર્નામેન્ટ દરમિયાન યુવરાજ સિંહે તેની ઓલ ટાઈમ બેસ્ટ ઈલેવન પસંદ કરી હતી, જેમાં તેણે એમએસ ધોનીનો સમાવેશ કર્યો ન હતો.
યુવરાજે પોતાના દુશ્મનને આપ્યું સ્થાન
વર્લ્ડ ચેમ્પિયનશિપ ઑફ લિજેન્ડ્સ 2024 દરમિયાન વાત કરતી વખતે, યુવરાજ સિંહે તેની સર્વશ્રેષ્ઠ XIનો ખુલાસો કર્યો હતો. આ ઈલેવનમાં યુવીએ ધોનીની જગ્યાએ ઓસ્ટ્રેલિયાના ભૂતપૂર્વ વિકેટકીપર બેટ્સમેન એડમ ગિલક્રિસ્ટનો સમાવેશ કર્યો હતો. આ સિવાય તેનો સૌથી મોટો દુશ્મન એન્ડ્રુ ફ્લિન્ટોફ પણ યુવીની XIમાં સામેલ હતો.
યુવરાજ સિંહ 12મો ખેલાડી
ઇંગ્લેન્ડના ભૂતપૂર્વ ઓલરાઉન્ડર એન્ડ્રુ ફ્લિન્ટોફ અને યુવરાજ સિંહ વચ્ચે 2007 T20 વર્લ્ડકપ દરમિયાન ઉગ્ર બોલાચાલી થઈ હતી. આ ચર્ચામાં ફ્લિન્ટોફે યુવીને ગળું કાપી નાખવાની ધમકી પણ આપી હતી. આ લડાઈ બાદ યુવીએ સ્ટુઅર્ટ બ્રોડની એક ઓવરમાં 6 સિક્સર ફટકારી હતી. યુવીએ પોતાની ઈલેવનમાં પોતાનો સમાવેશ કર્યો નથી. પછી જ્યારે તેને પૂછવામાં આવ્યું કે તમારી ટીમમાં 12મો ખેલાડી કોણ હશે? આ અંગે તેણે પોતાનું નામ લીધું હતું.
આ ભારતીય ખેલાડીઓનો સમાવેશ
યુવરાજે પોતાની સર્વશ્રેષ્ઠ પ્લેઈંગ-11માં સચિન તેંડુલકર, રોહિત શર્મા અને વિરાટ કોહલીના રૂપમાં ત્રણ ભારતીયોની પસંદગી કરી હતી. જોકે, યુવીએ પોતાની ટીમમાં કોઈપણ ભારતીય બોલરને સામેલ કર્યો ન હતો. તેણે સચિન તેંડુલકરને ઓપનિંગ માટે રાખ્યો હતો. આ સિવાય ત્રીજા નંબર માટે રોહિત શર્મા અને ચોથા નંબર પર વિરાટ કોહલીની પસંદગી કરવામાં આવી હતી. બોલરોમાં તેણે ભૂતપૂર્વ પાકિસ્તાની ફાસ્ટ બોલર વસીમ અકમરની પણ પસંદગી કરી હતી, જે આ ઈલેવનમાં એકમાત્ર પાકિસ્તાની ખેલાડી હતો.
યુવરાજ સિંહની ઓલ ટાઈમ બેસ્ટ ઈલેવન
સચિન તેંડુલકર (ભારત), રિકી પોન્ટિંગ (ઓસ્ટ્રેલિયા), રોહિત શર્મા (ભારત), વિરાટ કોહલી (ભારત), એબી ડી વિલિયર્સ (દક્ષિણ આફ્રિકા), એડમ ગિલક્રિસ્ટ (ઓસ્ટ્રેલિયા), શેન વોર્ન (ઓસ્ટ્રેલિયા), મુથૈયા મુરલીધરન (શ્રીલંકા) ), ગ્લેન મેકગ્રા (ઓસ્ટ્રેલિયા), વસીમ અકરમ (પાકિસ્તાન), એન્ડ્રુ ફ્લિન્ટોફ (ઇંગ્લેન્ડ).
