ગુજરાતભરમાં હાલ કાળઝાળ ગરમી અને અસહ્ય ઉકળાટથી જનજીવન ત્રાહિમામ પોકારી ગયું છે, ત્યારે હવામાન વિભાગે રાજ્યના નાગરિકો માટે રાહતના મિશ્ર સમાચાર આપ્યા છે. રાજ્યમાં એક તરફ તાપમાનનો પારો 41 ડિગ્રીને પાર પહોંચી ગયો છે, તો બીજી તરફ આ ભીષણ ગરમી વચ્ચે વેસ્ટર્ન ડિસ્ટર્બન્સ અને સાઇક્લોનિક સર્ક્યુલેશન સક્રિય થતાં કમોસમી વરસાદની ઘાત તોળાઈ રહી છે. હવામાન વિભાગની આગાહી મુજબ, આગામી બે દિવસ રાજ્યના અનેક વિસ્તારોમાં ગાજવીજ અને પવન સાથે વરસાદ થવાની પ્રબળ શક્યતા છે.
સુરત, ડાંગ અને તાપી જિલ્લામાં વરસાદી માહોલ
આજે દક્ષિણ ગુજરાતના સુરત, ડાંગ અને તાપી જિલ્લામાં વરસાદી માહોલ જામશે. આ ઉપરાંત નવસારી, વલસાડ, દમણ અને દાદરા નગર હવેલીમાં પણ વરસાદની સંભાવના વ્યક્ત કરવામાં આવી છે. સમગ્ર સૌરાષ્ટ્ર અને કચ્છના વિવિધ વિસ્તારોમાં પણ છૂટાછવાયા વરસાદી ઝાપટાં પડી શકે છે, જેને પગલે વાતાવરણમાં ભેજનું પ્રમાણ વધતાં બફારો વધુ આકરો બનશે.
