PM Modi In Seychelles : વડાપ્રધાન મોદી અને રાષ્ટ્રપતિ પેટ્રિક હર્મિનીએ બોટાનિકલ ગાર્ડનમાં કર્યું વૃક્ષારોપણ

વડાપ્રધાન નરેન્દ્ર મોદી સેશેલ્સની સત્તાવાર મુલાકાતે પહોંચ્યા, જ્યાં એરપોર્ટ પર તેમનું ઉષ્માભર્યું સ્વાગત કરવામાં આવ્યું. સેશેલ્સના રાષ્ટ્રપતિ ડૉ. પેટ્રિક હર્મિનીએ વ્યક્તિગત રીતે તેમનું સ્વાગત કર્યું. વડાપ્રધાન મોદીએ આ આવકાર બદલ આભાર વ્યક્ત કરતાં જણાવ્યું કે સેશેલ્સ હિંદ મહાસાગર ક્ષેત્રમાં ભારતનો મહત્વપૂર્ણ દરિયાઈ ભાગીદાર અને નજીકનો મિત્ર દેશ છે. તેમણે આ મુલાકાત બંને દેશો વચ્ચેના લાંબા ગાળાના સંબંધોને વધુ મજબૂત બનાવશે તેવી આશા વ્યક્ત કરી.

કચ્છના પરંપરાગત લોકનૃત્યની રંગારંગ રજૂઆત

એરપોર્ટ પર ભારતીય મૂળના લોકો અને ભારતીય સમુદાયે પણ વડાપ્રધાન મોદીનું આત્મીય સ્વાગત કર્યું હતું. આ પ્રસંગે કચ્છના પરંપરાગત લોકનૃત્યની રંગારંગ રજૂઆત કરવામાં આવી હતી, જેને વડાપ્રધાન મોદીએ ખાસ બિરદાવી હતી. તેમણે કહ્યું કે વિદેશમાં વસતા ભારતીયોએ ભારતની વિવિધ સાંસ્કૃતિક પરંપરાઓને જીવંત રાખી છે, જે ગૌરવની વાત છે.

મુલાકાત દરમિયાન વડાપ્રધાન મોદીએ સેશેલ્સની રાજધાની વિક્ટોરિયામાં આવેલા બોટાનિકલ ગાર્ડનની મુલાકાત લીધી હતી. અહીં તેમણે સેશેલ્સના રાષ્ટ્રપતિ ડૉ. પેટ્રિક હર્મિનીની હાજરીમાં વૃક્ષારોપણ કર્યું. આ પહેલને પર્યાવરણ સંરક્ષણ અને બંને દેશોની મિત્રતાના પ્રતીક તરીકે જોવામાં આવી રહી છે.

વિવિધ મુદ્દાઓ પર ચર્ચા થવાની સંભાવના

વડાપ્રધાન મોદીની આ મુલાકાત દરમિયાન દરિયાઈ સુરક્ષા, વેપાર, વિકાસ સહકાર, બ્લૂ ઇકોનોમી અને ક્ષમતાવર્ધન સહિતના વિવિધ મુદ્દાઓ પર ચર્ચા થવાની સંભાવના છે. ભારત અને સેશેલ્સ વચ્ચેના ઐતિહાસિક સંબંધોને વધુ ગાઢ બનાવવા તેમજ હિંદ મહાસાગર વિસ્તારમાં સહયોગ વધારવા માટે આ મુલાકાતને મહત્વપૂર્ણ માનવામાં આવી રહી છે. બંને દેશો વચ્ચે વ્યૂહાત્મક ભાગીદારીને નવી ગતિ મળશે તેવી અપેક્ષા વ્યક્ત કરવામાં આવી રહી છે.

આ પણ વાંચો : Mongla Port:બાંગ્લાદેશે ભારત પાસેથી પ્રોજેક્ટ છીનવી ચીનને સોંપ્યો 'મોંગલા પોર્ટ', જાણો કેમ વધી ચિંતા