પાકિસ્તાન અને ઈરાનના સંબંધોમાં મોટો ગરમાવો આવી ગયો છે. પાકિસ્તાનના વિદેશ મંત્રી ઇશાક ડાર પર ઈરાનના ગુપ્ત પરમાણુ કાર્યક્રમની માહિતી અમેરિકાને લીક કરવાનો અત્યંત ગંભીર આરોપ લાગ્યો છે. સીઆઈએ (CIA) ના પૂર્વ વિશ્લેષક લેરી જોન્સને ગુપ્ત સૂત્રોના હવાલેથી આ ચોંકાવનારો દાવો કર્યો છે, જેના કારણે અમેરિકી કોંગ્રેસમાં પણ ભારે હોબાળો મચી ગયો છે.
ઈરાન પાસે 60% 440 કિલો યુરેનિયમ છે
લેરી જોન્સનના જણાવ્યા અનુસાર, વિદેશ મંત્રી ઇશાક ડારે તાજેતરમાં અમેરિકાના વિદેશ મંત્રી માર્કો રુબિયો સાથે મુલાકાત કરી હતી. આ બેઠક દરમિયાન ડારે ઈરાનના પરમાણુ કાર્યક્રમના ઈરાદાઓ અંગે કેટલીક એવી નવી અને ગુપ્ત માહિતી આપી જેને સાંભળીને રુબિયો પોતે પણ હતપ્રભ રહી ગયા હતા. ડારે કથિત રીતે ચેતવણી આપી હતી કે જો ઈરાન સાથે વહેલી તકે પરમાણુ કરાર કરવામાં નહીં આવે, તો તે ટૂંક સમયમાં પરમાણુ હથિયાર બનાવી લેશે. ઇન્ટરનેશનલ એટોમિક એનર્જી એજન્સીના રિપોર્ટ મુજબ, ઈરાન પાસે હાલમાં 60% સુધી સંવર્ધિત 440 કિલો યુરેનિયમ છે, જેને હથિયાર બનાવવા માટે 90% સુધી સંવર્ધિત કરવું સરળ છે. આ આરોપ એટલે પણ ગંભીર છે કારણ કે પાકિસ્તાન આ કરારમાં મધ્યસ્થની ભૂમિકા ભજવી રહ્યું છે.
