Iran-USA Conflict : હોર્મુઝ સ્ટ્રેટમાં અમેરિકાની મોટી કાર્યવાહી, 2 ઈરાની ડ્રોન તોડી પાડ્યા

મિડલ ઈસ્ટમાં ચાલી રહેલો તણાવ સતત વધી રહ્યો છે અને અમેરિકા તથા ઈરાન વચ્ચે ચાલી રહેલી કૂટનીતિક ચર્ચાઓ છતાં કોઈ સ્પષ્ટ પરિણામ આવ્યું નથી. બંને દેશો પોતાના વલણ પર અડગ છે, જેના કારણે શાંતિ સ્થાપિત કરવાની પ્રક્રિયા અટકી ગઈ છે.

અમેરિકી દળોએ આ ડ્રોનને સફળતાપૂર્વક નષ્ટ કર્યા

આ વચ્ચે અમેરિકાની સેન્ટ્રલ કમાન્ડ CENTCOM એ દાવો કર્યો છે કે તેણે હોર્મુઝ સ્ટ્રેટમાં બે ઈરાની હુમલાખોર ડ્રોનને તોડી પાડ્યા છે. CENTCOM અનુસાર આ ડ્રોન આંતરરાષ્ટ્રીય દરિયાઈ પરિવહન અને વેપારી જહાજો માટે ખતરો ઉભો કરી રહ્યા હતા, તેથી આ કાર્યવાહી કરવામાં આવી. CENTCOMએ રવિવારે સોશિયલ મીડિયા પોસ્ટમાં જણાવ્યું કે મધ્ય પૂર્વમાં તૈનાત અમેરિકી દળોએ આ ડ્રોનને સફળતાપૂર્વક નષ્ટ કર્યા અને દરિયાઈ માર્ગોની સુરક્ષા સુનિશ્ચિત રાખવા માટે તેઓ સંપૂર્ણ રીતે સતર્ક છે. નિવેદનમાં વધુમાં કહેવામાં આવ્યું કે અમેરિકી દળો કોઈપણ સંભવિત ખતરાનો જવાબ આપવા માટે તૈયાર અને હાઈ એલર્ટ પર છે.

આ ઘટનાઓથી બંને દેશો વચ્ચે તણાવ વધુ વધ્યો

આ પહેલા શનિવારે પણ અમેરિકાએ દાવો કર્યો હતો કે તેણે હોર્મુઝ સ્ટ્રેટ તરફ મોકલાયેલા ચાર ઈરાની હુમલાખોર ડ્રોનને અટકાવ્યા હતા અને ત્યારબાદ ઈરાનના તટીય રડાર સ્થળો પર હુમલા પણ કરવામાં આવ્યા હતા. આ ઘટનાઓથી બંને દેશો વચ્ચે તણાવ વધુ વધ્યો છે અને શાંતિ ચર્ચાઓ પર તેની અસર પડવાની શક્યતા છે.

આ પણ વાંચો : India-Nepal Relation : સરહદ વિવાદ વચ્ચે નેપાળના વિદેશ મંત્રી ભારત પહોંચ્યા અને જયશંકર સાથે યોજી બેઠક, જાણો કારણ