મિડલ ઈસ્ટમાં ચાલી રહેલો તણાવ ઘટવાનું નામ નથી લઈ રહ્યો. અમેરિકા અને ઈરાન વચ્ચે સંઘર્ષ ખતમ કરવા માટે સતત રાજદ્વારી વાટાઘાટો ચાલી રહી છે, પરંતુ બંને દેશો પોતપોતાના વલણ પર અડગ છે. આ દરમિયાન અમેરિકી સેન્ટ્રલ કમાન્ડ (CENTCOM) એ હોર્મુઝની ખાડી (Strait of Hormuz) માં મોટી કાર્યવાહી કરતા આંતરરાષ્ટ્રીય શિપિંગ રૂટ માટે જોખમ બનેલા ઈરાનના વધુ બે વન-વે એટેક ડ્રોનને તોડી પાડ્યા છે. અમેરિકાના આ પગલાથી બંને દેશો વચ્ચે ચાલી રહેલી શાંતિ વાર્તા પર નકારાત્મક અસર પડી શકે છે.
અમેરિકી સેના હાઈ એલર્ટ પર
CENTCOM એ સોશિયલ મીડિયા પર આ કાર્યવાહીની સત્તાવાર માહિતી શેર કરી છે. અમેરિકી કમાન્ડે જણાવ્યું કે, આ ડ્રોન વ્યૂહાત્મક રીતે મહત્વપૂર્ણ એવા હોર્મુઝ જળમાર્ગમાં કોમર્શિયલ જહાજો માટે મોટો ખતરો હતા. સેનાએ સ્પષ્ટ કર્યું છે કે વિસ્તારમાં કોઈપણ ઈરાની આક્રમકતાનો સામનો કરવા અને આંતરરાષ્ટ્રીય વેપારી માર્ગોની સુરક્ષા માટે અમેરિકી દળો સંપૂર્ણપણે તૈયાર અને હાઈ એલર્ટ પર છે. આ પહેલા શનિવારે પણ અમેરિકાએ ઈરાનના ચાર ડ્રોન તોડી પાડ્યા હતા અને ઈરાનની કોસ્ટલ રડાર સાઇટ્સ પર હુમલા કર્યા હતા.
